بۇگىن تۇندە بەلگىلى جۋرناليست ۆيكتور سۋتياگيننىڭ كولىگى جارىلىپ، تۇگى قالماي ورتەنىپ كەتتى، دەپ حابارلايدى “ادىرنا” ءتىلشىسى Ulysmedia.kz -كە سىلتەمە جاساپ.
پوليتسيا مۇلىكتى قاساقانا جويۋ فاكتىسىن تىركەدى.
ايتا كەتەيىك، سۋتياگين مەملەكەتتىك باق-تىڭ مەنشىكتى ءتىلشىسى بولىپ جۇمىس ىستەيدى جانە قوعامدىق قىزمەتپەن اينالىسادى، وتكەن جىلدان باستاپ اتىراۋ وبلىسىنىڭ قوعامدىق كەڭەسىندە قىزمەت ەتەدى.
ەسكە سالساق، 10 جانە 13 قاڭتار كۇندەرى بەلگىسىز بىرەۋلەر Elmedia.kz سايتى رەداكتسياسى كەڭسەسىنىڭ تەرەزەلەرىن سىندىرىپ كەتكەن بولاتىن. بۇل التى ايداعى رەداتسياعا جاسالعان التىنشى شابۋىل رەتىندە تىركەلدى.
رەداكتسيا جەتەكشىسى گۇلجان ەرعاليەۆا ىشكى ىستەر مينيسترىنەن جاعدايدى باقىلاۋعا الۋدى تالاپ ەتتى. پرەزيدەنت توقاەۆ وقيعاعا جاۋاپ بەرىپ، شابۋىلداردى مۇقيات تەكسەرۋدى تاپسىردى.
13 قاڭتاردا بەلگىسىز بىرەۋلەر بەلگىلى بلوگەر دينارا ەگەۋباەۆانىڭ كولىگىن ورتەپ جىبەرگەن. جىل باسىندا ول «التىنشى قاڭتار» بلوگىن قۇرۋ تۋرالى حابارلاپ، ءبىر مانداتتى وكرۋگتەر بويىنشا ءماجىلىستىڭ مەرزىمىنەن بۇرىن سايلاۋىنا قاتىسۋعا دايىن ەكەنىن جەتكىزگەن.
الماتى پوليتسياسى ءورت قويدى دەگەن كۇدىكپەن كامەلەتكە تولماعان بەس ءجاسوسپىرىمدى ۇستادى. ولار، سونداي-اق El Media-عا شابۋىل جاسادى دەگەن كۇدىككە ءىلىندى. ءتارتىپ ساقشىلارى جەتكىنشەكتەردىڭ ينتەرنەت ارقىلى «تاپسىرىس» العانىن حابارلادى.
وتكەن جىلدىڭ قازان ايىندا Orda.kz اقپاراتتىق پورتالىنىڭ رەداكتسياسىنا باس رەداكتور گۇلنار باجكەنوۆانىڭ سۋرەتى مەن شوشقانىڭ باسى سالىنعان پاكەت بارعان. وندا ادەيى جىرتىلعان فوتو جانۋاردىڭ اۋزىنا سالىنعان. باجكەنوۆانىڭ ءوزى بۇعان نازارباەۆتار وتباسى مەن تۇڭعىش پرەزيدەنت تۋرالى جاريالانىمدارى سەبەپ بولعانىن مالىمدەدى.
18 قاڭتاردا شابۋىلداۋشىلار Ulysmedia.kz سايتىن بۇزىپ، باس رەداكتور سامال يبراەۆا مەن ونىڭ وتباسىنىڭ جەكە دەرەكتەرىن جاريالادى. سايت باسشىسى پوليتسياعا ارىز جازىپ، قىلمىستىق ءىس قوزعالدى.
19 قاڭتاردا جۋرناليست جانە Hyperborey YouTube ارناسىنىڭ اۆتورى ۆاديم بورەيكو پاتەرىنىڭ ەسىگىن الدەبىرەۋلەر قۇرىلىس كوبىگىمەن جاۋىپ تاستاعانى جايىندا حابار تارادى. ءجۋرناليستىڭ ايتۋىنشا، ولار ەسىكتى جاۋىپ، كەيىن ونى ورتەپ جىبەرمەك بولعان.
سونداي-اق، جۋىردا عانا Ulysmedia.kz كەڭسەسىنە بىرەۋلەر مال ەتى مەن باس رەداكتوردىڭ بالالارىنىڭ سۋرەتى سالىنعان قوراپ جىبەرگەن. سامال يبراەۆا بۇل ارەكەتتى رەداكتسيانى قورقىتۋ دەپ باعالايدى. قۇقىق قورعاۋ ورگاندارى قىلمىستىق ءىس قوزعادى. سوتقا دەيىنگى تەرگەۋ امالدارى جۇرگىزىلىپ جاتىر.
20 اقپانعا قاراعان ءتۇنى الدەكىم جۋرناليست ۆاديم بورەيكنونىڭ وپەراتورىنىڭ ەكى كولىگىن ورتەپ كەتكەن.
سونىمەن قاتار، 22 اقپاندا جۋرناليست دانيار مولدابەكوۆ وزىنە شابۋىل جاسالعانىن مالىمدەدى.
28 قاڭتاردا جۋرناليستەرگە جاسالعان شابۋىلداردىڭ ۇيلەستىرۋشىسى ۇستالعانى حابارلاندى.
4 ناۋرىزدا ءىىم شابۋىلداردىڭ باستى ۇيىمداستىرۋشىسىن اتادى.
مينيستر احمەتجانوۆتىڭ دەرەگىنشە، باق وكىلدەرىنە شابۋىل جاساۋ دەرەكتەرى بويىنشا بارلىعى 30-دان استام ءىس قوزعالىپ، 22 ادامنىڭ كۇدىكتى دەپ تانىلعان. بۇدان بۇرىن جەتى ادام قاماۋدا وتىرعانى حابارلانعان.
