7 مامىردا استانادا جاڭا «ادىلەت» ساياسي پارتياسىنىڭ قۇرىلتاي سەزى ءوتتى. پارتيانىڭ رەسمي قىزمەتى باستالعان جيىنعا قازاقستاننىڭ بارلىق وڭىرىنەن شامامەن 1000 دەلەگات قاتىستى.
سەزد بارىسىندا پارتيانىڭ باسشىلىق قۇرامى سايلانىپ، پارتيا توراعاسى بولىپ دادەباي ايبەك ارقابايۇلى تاعايىندالدى.
قۇرىلتاي سەزىندە ءسوز سويلەگەن پارتيا توراعاسى ۇيىمنىڭ نەگىزگى باعىتى زاڭ ۇستەمدىگى مەن ءتارتىپ قاعيداتتارىنا نەگىزدەلەتىنىن ايتتى. ونىڭ سوزىنشە، قوعامداعى ادىلدىك قاعيداتى كۇندەلىكتى ءومىردىڭ اجىراماس بولىگىنە اينالۋى كەرەك.
ء«بىزدىڭ پارتيامىزدىڭ نەگىزى زاڭ ۇستەمدىگى مەن ءتارتىپ قاعيداتتارىنا قۇرىلادى. حالىقتىڭ زاڭ ۇستەمدىگىنە دەگەن سەنىمى – مەملەكەتتىڭ باستى تىرەگى. سوندىقتان ءبىزدىڭ مىندەتىمىز – ادىلدىكتى تەك جاريالاۋ ەمەس، ونى قوعامدىق مادەنيەتتىڭ ءبىر بولىگىنە اينالدىرۋ»، – دەدى ايبەك دادەباي.
پارتيا وكىلدەرىنىڭ ايتۋىنشا، «ادىلەت» پرەزيدەنت قاسىم-جومارت توقاەۆ جۇرگىزىپ وتىرعان رەفورمالار باعىتىن قولدايدى. ۇيىم ءوز قىزمەتىن زاڭ مەن ءتارتىپ، ءتيىمدى مەملەكەتتىك ينستيتۋتتار، وڭىرلەردى دامىتۋ، ادىلەتتى ەكونوميكا، تسيفرلىق مەملەكەت جانە الەۋمەتتىك ىنتىماق باعىتتارىندا جۇرگىزۋدى جوسپارلاپ وتىر.
سونداي-اق پارتيا باعدارلاماسىندا «حالىق ۇنىنە قۇلاق اساتىن مەملەكەت» تۇجىرىمداماسى، ەكولوگيالىق باستامالار مەن حالىقارالىق جاۋاپكەرشىلىك ماسەلەلەرى قامتىلعان.
ايبەك دادەباي پارتيانىڭ باستى ماقساتى بەلسەندى ءارى جاۋاپتى ازاماتتاردى بىرىكتىرۋ ەكەنىن اتاپ ءوتتى.
ء«بىزدىڭ نيەتتەستەرىمىز – ەل دامۋىنا ۇلەس قوسۋعا دايىن ازاماتتار. ءبىز اشىقتىق پەن جاۋاپكەرشىلىك قاعيداتتارىن ۇستانامىز. قوعام الدىندا ەسەپ بەرىپ، جۇيەلى جۇمىس جۇرگىزۋگە نيەتتىمىز»، – دەدى ول.
