رەسەيدە مارقۇم بولعان تاجىكستاندىق ايەلدىڭ دەنەسى ەلىنە جەتكىزىلدى، دەپ حابارلايدى "ادىرنا" ۇلتتىق پورتالى.
ۆاحدات قالاسىنىڭ 30 جاستاعى تۇرعىنى دجاميلا نۋرزودتىڭ ءمايىتى ماسكەۋدەن ەلگە جەتكىزىلىپ، تۋعان جەرىندە جەر قوينىنا بەرىلدى. ونىڭ ولىمىنە رەسەي ازاماتى ايىپتالىپ وتىر.
راديو وزودي حابارلاۋىنشا، رەسەيلىك 49 جاستاعى ۆلاديمير ۋپاديشەۆ كۇدىككە ىلىنگەن. سوت 6 قازاندا ونى الدىن الا قاماۋعا الۋ تۋرالى شەشىم قابىلداعان.
تەرگەۋ نۇسقاسىنا سايكەس، بيىل 21 قىركۇيەكتە كۇدىكتى دجاميلانى پاتەرىن جيناۋعا جالداعان. الايدا ايەل پاتەردىڭ تىم لاس ەكەنىن كورىپ، جۇمىستان باس تارتقان. وسىدان كەيىن ەر ادام اشۋعا ءمىنىپ، وعان بىرنەشە رەت بۇراۋىشپەن سوققى جاساعان.
باق حابارلاۋىنشا، دجاميلا ەسىنەن تانعان سوڭ، ۋپاديشەۆ قىلمىس ءىزىن جاسىرۋ ءۇشىن پاتەرگە وت قويىپ، ەسىكتى جاۋىپ قاشىپ كەتكەن. كورشىلەر ءتۇتىندى بايقاپ، ءورت سوندىرۋشىلەردى شاقىرعان. ايەل اۋرۋحاناعا جەتكىزىلگەنىمەن، العان جاراقاتىنان كوز جۇمعان.
مارقۇمنىڭ تانىستارىنىڭ ايتۋىنشا، جانجال ەر ادامنىڭ ءجابىر كورسەتۋگە ارەكەتتەنۋىنەن باستالعان. قازىرگى ۋاقىتتا كۇدىكتىنىڭ ءوزى نەمەسە ونىڭ قورعاۋشىلارى تۇسىنىكتەمە بەرمەگەن.
دجاميلا نۋرزود ماسكەۋدە ەڭبەك ميگرانتى رەتىندە جۇمىس ىستەگەن، ارتىندا كىشكەنتاي ۇلى قالدى.
