«ءبىز ميلليونەر ەمەسپىز!». اقتوبەنىڭ پريگورودنىي اۋىلىنىڭ تۇرعىندارى اكىمنەن اۆتوبۋس ماسەلەسىن شەشىپ بەرۋدى سۇرايدى. ايتپەسە، تاكسي جۇرگىزۋشىلەرىنە جەم بولدىق دەپ وتىر. قوعامدىق كولىك دۇرىس قاتىنامايتىنىن ءبىلىپ العان كولىكتەگىلەر باعانى اسپانداتىپ جىبەرگەن. كۇن سايىن قالاعا قاتىناۋ ءۇشىن كەمى 5000 تەڭگە سۇرايتىن كورىنەدى. اۋىلدىقتاردىڭ بازىناسىن تىڭداپ كەلگەن اقبايان سۇلتانمۇراتوۆا جالعاستىرادى.
بۇل تۋرالى «ەۋرازيا» ءبىرىنشى ارناسى حابارلايدى.
پريگورودنىي ەلدى مەكەنى قالادان 15 شاقىرىم جەردە. اقتوبەنىڭ الماتى اۋدانىنا قارايدى. تۇرعىندار قوعامدىق كولىكتەن كۇدەر ۇزگەن. اينالدىرعان ەكى اۆتوبۋس ءۇش مىڭ حالقى بار اۋىلعا ازدىق ەتەدى دەگەن جۇرت، ونىڭ ءوزى ۋاقىتىلى جۇرمەيتىنىنە اشىنادى.
نازيرا دوسجانوۆا، پريگورودنىي اۋىلىنىڭ تۇرعىنى: «ءبىر ساعات، ساعات جارىم، كەيدە ءتىپتى سىنىپ قالعاندا ەكى ساعاتقا دەيىن بارادى. قالاداعى جۇمىسقا باراتىن بالالارىمىز كەشىگىپ بارادى، ۇنەمى تاكسيمەن بارا المايدى، اقشا از».
اۆتوبۋس كۇتىپ شارشاعان جۇرت امالسىز تاكسي شاقىرادى ەكەن. كۇندىز تاكسيلەر ادام باسىنا ءبىر باعىتقا 500 تەڭگە السا، جەكە ءبىر ءوزىڭ تاكسي جالداۋ قىمباتقا تۇسەدى.
ايناگۇل تىنىشتىققىزى، پريگورودنىي اۋىلىنىڭ تۇرعىنى: «مەن كاجدىي بالاعا «يندرايۆەرمەن» شاقىرام، 2000-2500-عا كەلمەيدى ءتىپتى. ولار سوسىن جولعا شىعادى، كەيدە بولادى ءتۇيىپ كەتەدى».
پريگورودنىيداعىلار كورشى اۋىلدىڭ اۆتوبۋسىمەن قاتىناپ تا كورىپتى، بىراق، ونىڭ ءوز جولاۋشىلارى بار، ءارى اۋىلعا سوقپايدى دەپ وتىر. جينالعان جۇرت اكىمنەن اۋىلعا جۇرەتىن اۆتوبۋستاردىڭ ءجۇرۋ ۋاقىتىن رەتتەۋدى سۇرايدى. باعىتقا كۇنىنە 4-5 اۆتوبۋس شىعارسا، جاعداي تۇزەلەر ەدى دەپ سانايدى. ال ەكى اۆتوبۋستىڭ ارقايسىسى اۋىلعا كۇنىنە 6 رەت قاتىنايدى ەكەن.
- ينتەرۆال قانشا؟
- 1 ساعات.
- نەگىزگى تالاپ سونداي ما؟
- جوق ەندى...
- كەيدە ەكى ساعات كۇتىپ قالامىز دەيدى...
- بولادى شىعار، بىلمەدىم ول جاعىن. 2 ساعات بولمايدى، وتىرىك ايتا بەرەدى.
- نەگە ەكى-اق اۆتوبۋس؟
- ەندى جەتپەي جاتقان شىعار، قايدان بىلەيىن؟
اكىم-قارالار حالىقتىڭ شاعىمىنان حاباردار. الايدا، قوعامدىق كولىك ماسەلەسىنە قالالىق اكىمدىك جاۋاپتى، ءبىز تەك ارىزدى جەتكىزۋشىمىز دەپ وتىر.
امانبەك شالاباەۆ، الماتى اۋدانى اكىمدىگى تۇرعىن ءۇي-كوممۋنالدىق شارۋاشىلىق ءبولىمىنىڭ باسشىسى: «قوعامدىق كولىك جونىندە گرافيكتىڭ ساقتالماۋى، ۋاقىتىندا جۇرمەۋى سول بويىنشا قالالىق جكح جانە اۆتودوروگي بولىمىنە حات تۇرىندە حابارلاپ وتىرمىز: كولىك سانىن كوبەيتۋ جانە گرافيك ساقتالۋ كەرەك».
قالا اكىمىنىڭ ورىنباسارى №29 باعىتتاعى ينتەرۆالدى ازايتۋ ماقساتىندا اۆتوبۋس سانىن كوبەيتەتىندىكتەرىن ايتتى. ول ءۇشىن تاسىمالداۋشى مەكەمەگە ۇسىنىس ايتىپتى. قازان ايىنان باستاپ باعىتقا 7 اۆتوبۋس شىعاتىن بولادى.
"ادىرنا" ۇلتتىق پورتالى
