ادىرنا ۇلتتىق پورتالىندا «قاراشادا ءومىر تۇر». اقىندار اقتوبەگە ايتىسۋعا ەمەس، اس ىشۋگە جينالا ما؟» دەگەن تاقىرىپپەن ماتەريال جاريالانعان ەدى. سول ماقالاعا قاتىستى اقتوبە وبلىسىنىڭ مادەنيەت، ارحيۆتەر جانە قۇجاتتاما باسقارماسى سىرعىما جاۋاپ بەردى، - دەپ حابارلايدى ادىرنا ۇلتتىق پورتالى.
ادىرنا پورتالى جاريالاعان ماقالادا 14 ايتىسكەردىڭ ءۇش كۇندىك قوناق ءۇيى مەن تاماعى ءۇشىن وبلىس بيۋدجەتىنەن 2 ملن 122 مىڭ تەڭگە بولىنگەنى، 14 ادامدى ءۇش كۇن كۇتۋ ءۇشىن مۇنشا كوپ اقشا جۇمساۋ لوگيكاعا سىيمايتىنى سىنالعان ەدى.
سونداي-اق، باسقارماعا پورتال اتىنان ناقتى ساۋال جولدانعان بولاتىن.
تەندەردىڭ تەحنيكالىق سيپاتتاماسىنا قاراساڭىز، اقتوبەگە قازىلار القاسى مەن ايتىسكەرلەر ايتىس وتكىزۋگە ەمەس، تاماق ىشۋگە جينالاتىنداي اسەر قالدىرادى ەكەن. سوعان وراي پورتال ءتىلشىسى مادەنيەت باسقارماسىنا: «سالتاناتتى شارادا 30 ادام ارقايسىسى 20 مىڭنىڭ تاماعىن ءىشىپ العان سوڭ، قازىلار ءۇش كۇنگە دەپ بولىنگەن – 15 مىڭ، ايتىسكەرلەر 10 مىڭ تەڭگەنىڭ تاماعىنا جانە جۇگىرە مە؟ جوق، الدە سالتاناتتى شارانىڭ اس ءمازىرى قازىلار القاسى مەن ايتىسكەر اقىندارعا ارنالماعان با؟» دەگەن ساۋال جولداعان ەدى.
بۇعان وبلىستىق مادەنيەت باسقارماسىنىڭ باسشىسى ا. يۋنيسوۆا بىلاي دەپ جاۋاپ قاتقان:
«2023 جىلعى 18 قاراشا كۇنى اقتوبەدە قازاقتىڭ ۇلى حانى ابىلقايىر حاننىڭ 330 جىلدىعىنا ارنالعان «ۇلتىن سۇيگەن ۇلى تۇلعا» اتتى رەسپۋبليكالىق اقىندار ايتىسى ءوتتى.
ايتىستى وتكىزۋ جانە ۇيىمداستىرۋ ءۇشىن «بيۋدجەت قاراجاتى ەسەبىنەن قارجىلاندىرىلاتىن قازاقستان رەسپۋبليكاسىنداعى جانە شەتەلدەگى مادەنيەت سالاسىنداعى الەۋمەتتىك ماڭىزى بار ءىس-شارالار مەن مادەني ءىس-شارالاردى وتكىزۋدى قارجىلاندىرۋ قاعيدالارى مەن قارجىلاندىرۋ نورماتيۆتەرىن بەكىتۋ تۋرالى» قازاقستان رەسپۋبليكاسى مادەنيەت جانە سپورت ءمينيسترىنىڭ م.ا. 2023 جىلعى 16 اقپانداعى № 51 بۇيرىعىنا سايكەس رەسپۋبليكالىق بايقاۋلار مەن فەستيۆالدەرگە قاتىسۋشىلاردىڭ جول، تۇرۋ (كەلۋ ۋاقىتى: 17 قاراشا، كەتۋ ۋاقىتى: 19 قاراشا)جانە تاماقتانۋ بويىنشا 2112,0 مىڭ تەڭگە (رەد: 2 ملن 122 مىڭ) شىعىستارى بەكىتىلدى.
ايتىستى وتكىزۋ جانە ۇيىمداستىرۋ ءۇشىن قازاقستان رەسپۋبليكاسى مەملەكەتتىك ساتىپ الۋ پورتالىنا وسى 2112,0 مىڭ تەڭگەگە ۇسىنىس باعا بەرىلدى. مەملەكەتتىك ساتىپ الۋدىڭ قورىتىندى حاتتاماسىنا سايكەس جەكە كاسىپكەر «ە ا» 1 715,0 مىڭ تەڭگەگە (رەد: 1 ملن 715 تەڭگە) ۇتىپ الدى. «ە ا» جك-مەن كەلىسىم-شارت ارقىلى جۇمىستار جۇرگىزىلدى.
بەرىلگەن جاۋاپپەن كەلىسپەگەن جاعدايدا «قازاقستان رەسپۋبليكاسىنىڭ اكىمشىلىك راسىمدىك-پروتسەستىك كودەكسى» 91 بابىنا سايكەس شاعىم بەرە الاسىز» دەلىنگەن.
ۇزىن-سونار سىرعىما جاۋاپتان تۇكتى ۇقپادىق. «سالتاناتتى شارانىڭ اس ءمازىرى قازىلار القاسى مەن ايتىسكەر اقىندارعا ارنالماعان با؟» دەگەن تىكە ساۋالعا باسقارما جاۋاپ تاپپاسا كەرەك. سوندا ابىلقايىر حاننىڭ 330 جىلدىعىنا اقىندار ايتىسۋعا ەمەس، اس ىشۋگە كەلگەنى مە؟ ارينە، رەسپۋبليكانىڭ ءار تۇكپىرىنەن كەلگەن اقىندار تاماق تا ىشەدى، قوناق ۇيگە دە قونادى. بىراق، وعان بيۋدجەتتىڭ قارجىسى جۇمسالاتىن بولعاندىقتان تەندەر ەسەبى كۇمان تۋدىرمايتىنداي بولعانى كەرەك قوي.
ءبىزدىڭ ايتپاعىمىز وسى عانا...
قانات بىرلىكۇلى
ادىرنا ۇلتتىق پورتالى
