ەلورداداعى Mega Silk Way ساۋدا-ويىن-ساۋىق ورتالىعىندا قازاقستان رەسپۋبليكاسى كونستيتۋتسياسىنىڭ جاڭا رەداكتسياسىن قولداۋعا ارنالعان اۋقىمدى كونتسەرت ءوتتى. بۇل تۋرالى استانا اكىمدىگىنىڭ رەسمي سايتى ەلوردالىق «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» جالپىۇلتتىق كواليتسياسىنىڭ قالالىق فيليالىنا سىلتەمە جاساپ حابارلادى.
ءىس-شارا «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» جالپىۇلتتىق كواليتسياسىنىڭ قىزمەتى اياسىندا ۇيىمداستىرىلىپ، ەلوردا تۇرعىندارى مەن قوناقتارىن كونستيتۋتسيالىق وزگەرىستەر يدەياسى توڭىرەگىندە بىرىكتىردى.
ۇيىمداستىرۋشىلاردىڭ مالىمەتىنشە، كونتسەرتكە 5 مىڭعا جۋىق ادام قاتىستى. ولاردىڭ قاتارىندا جاستار، قوعام وكىلدەرى جانە ساۋدا-ويىن-ساۋىق ورتالىعىنىڭ كەلۋشىلەرى بولدى. ءىس-شارا اتموسفەراسى ازاماتتىق بەلسەندىلىك پەن قوعامنىڭ الداعى وزگەرىستەرگە دەگەن قىزىعۋشىلىعىن ايقىن كورسەتتى.
ساحنادا قازاقستاندىق ەسترادا جۇلدىزدارى – مارجان اراپباەۆا، «بايتەرەك» توبى، ەركەش حاسەن، ءمادي سىزدىقوۆ، «جوشى» توبى، زارينا بوجاكوۆا جانە ميراس جۇگىنىسوۆ ونەر كورسەتتى.
كونتسەرت بارىسىندا جينالعان قاۋىم الدىندا قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى، استانا قالاسى ءماسليحاتىنىڭ دەپۋتاتتارى، سونداي-اق قوعامدىق كەڭەس پەن جالپىۇلتتىق كواليتسيا شتابىنىڭ مۇشەلەرى ءسوز سويلەدى. ولار كونستيتۋتسيانىڭ جاڭا رەداكتسياسىنداعى نەگىزگى ەرەجەلەردى ءتۇسىندىرىپ، ۇسىنىلىپ وتىرعان وزگەرىستەردىڭ قۇقىقتىق مەملەكەتتى ودان ءارى دامىتۋ جانە قوعامدىق بىرلىكتى نىعايتۋ ءۇشىن ماڭىزدىلىعىن اتاپ ءوتتى.
ۇيىمداستىرۋشىلار مۇنداي ءىس-شارالار ازاماتتاردى اقپاراتتاندىرۋعا جانە الداعى رەفەرەندۋم ماسەلەلەرى بويىنشا اشىق قوعامدىق ديالوگ قالىپتاستىرۋعا باعىتتالعانىن جەتكىزدى.
