اقتوبە قالاسىنىڭ تۇرعىنى جۇلدىز تلەۋف پەن ونىڭ بەس بالاسى جاڭا پاتەرگە يە بولدى، دەپ حابارلايدى "ادىرنا" ۇلتتىق پورتالى.
بۇل تۋرالى وتباسىنىڭ تۇڭعىشى قۇرالاي ەسبولاتوۆا الەۋمەتتىك جەلىدەگى پاراقشاسىندا جزادى.
ول قۋانىشتى جاڭالىعىمەن ءبولىسىپ، قازاقستاندىقتارعا العىسىن ءبىلدىردى.
«بۇل ءبىز ءۇشىن كۇتپەگەن توسىن سىي بولدى. كوپتەن كۇتكەن كۇنىمىز كەلدى. كەرەمەت كۇننىڭ، جاڭا ءومىردىڭ باستاۋى دەپ بىلەمىن. بىزگە قولداۋ كورسەتكەن بارشا قازاق ەلىنە ۇلكەن راقمەت»، – دەپ جازدى ول.
قۇرالايدىڭ ايتۋىنشا، باسپانا قوعامدىق قوردىڭ قولداۋىمەن بەرىلگەن.
ەسكە سالا كەتسەك، بۇعان دەيىن الەۋمەتتىك جەلىدە جۇلدىز تلەۋفتىڭ تاعدىرى جۇرتتىڭ نازارىن اۋدارعان ەدى.
ونىڭ قىزى قۇرالاي جەلىدەگى پاراقشاسىندا كومەك سۇراپ، جازبا جاريالاعان.
"انامىزدى جۇيكە اۋرۋىنا شالدىقتى دەپ ءماجبۇرلى تۇردە ەسەپكە قويدى. بۇل – ناعاشىلارىم مەن انام اراسىنداعى مۇلىككە تالاستان كەيىن باستالدى. ءۇيىمىزدى ساتىپ، انامنىڭ تەلەفونى مەن مەنىڭ بانك كارتامدى پايدالانىپ، سىنىپتاستارىم مەن اتا-انالاردان اقشا جيناعان. ەندى ءبىز پاتەر جالداپ، باسپاناسىز قالدىق. اناما شيزوفرەنيا دياگنوزى قويىلدى", – دەگەن قۇرالاي.
جەرگىلىكتى ورگاندار جاعدايدان حاباردار ەكەنىن ايتىپ، وتباسى باقىلاۋدا بولعانىن حابارلاعان.
