9 مامىردا ماسكەۋدە وتەتىن ءداستۇرلى جەڭىس پارادىنا العاش رەت اسكەري تەحنيكا قاتىسپايدى. بۇل تۋرالى رەسەي قورعانىس مينيسترلىگى ايتتى، دەپ حابارلايدى «ادىرنا» ءتىلشىسى.
سۋۆوروۆ جانە ناحيموۆ ۋچيليششەلەرىنىڭ تاربيەلەنۋشىلەرى، كادەت كورپۋستارى دا پارادقا قاتىسپايدى. ۆەدومستۆو بۇل شەشىم قازىرگى جەدەل جاعدايعا بايلانىستى قابىلدانعانىن ءتۇسىندىردى. دەگەنمەن، پارادقا اسكەري ۇشاقتار قاتىساتىنى ايتىلدى.
رەسەي وڭىرلەرىندە 9 مامىرعا ارنالعان جاپپاي ءىس-شارالار دا قىسقارتىلۋدا. مىسالى، نيجني نوۆگورود، ساراتوۆ، چۋۆاشيا جانە كالۋگا وبلىسىندا پاراد وتكىزىلمەيدى. ۆورونەج، كۋرسك، بريانسك جانە بەلگورود وبلىستارىندا مەرەكەلىك وتشاشۋدان باس تارتۋ تۋرالى شەشىم قابىلدانعان. جەرگىلىكتى بيلىك بارلىق جاعدايدا قاۋىپسىزدىك ماسەلەلەرىن نەگىزگە العان.
سوڭعى ايلاردا ۋكراينا رەسەي ارمياسىنىڭ سوققىلارىنا جاۋاپ رەتىندە ەلدىڭ ءارتۇرلى وڭىرلەرىندەگى ينفراقۇرىلىم نىساندارىنا شابۋىل جاساعان. ولاردىڭ قاتارىندا بالتىق تەڭىزىندەگى مۇناي ەكسپورتى جۇرەتىن پورتتار مەن تۋاپسەدەگى مۇناي وڭدەۋ زاۋىتى دا بار.
2025 جىلدىڭ 9 مامىرىندا رەسەيدە ءناتسيزمدى جەڭۋدىڭ 80 جىلدىعى اتالىپ وتكەن ەدى. سول جىلى پارادقا 10 مىڭنان استام اسكەري قىزمەتكەر، سونىڭ ىشىندە سولتۇستىك كورەيا وكىلدەرى دە قاتىسىپ، شامامەن 200 بىرلىك اسكەري تەحنيكا كورسەتىلگەن. ولاردىڭ اراسىندا 80 جىل بۇرىنعى جانە قازىرگى زامانعى تەحنيكالار بولعان.
رەسەي پرەزيدەنتى ۆلاديمير پۋتين وتكەن جىلعى قىزىل الاڭداعى پارادتا سويلەگەن سوزىندە كەڭەس وداعىنىڭ 1941–1945 جىلدارداعى ناتسيستىك گەرمانياعا قارسى سوعىسىن رەسەيدىڭ ۋكرايناعا قارسى جالعاسىپ جاتقان سوعىسىمەن سالىستىرعان ەدى.
