SpaceX كومپانياسى شامامەن 75 ملرد دوللار ينۆەستيتسيا تارتقاننان كەيىن يلون ماسكتىڭ جالپى داۋلەتى ايتارلىقتاي ءوستى. Reuters دەرەگىنشە، وسى مامىلە كاسىپكەردىڭ نەگىزگى اكتيۆتەرىنىڭ قۇنىن كۇرت ارتتىرعان، دەپ حابارلايدى "ادىرنا".
عارىشتىق تەحنولوگيالار، سپۋتنيكتىك جۇيەلەر جانە جاساندى ينتەللەكت باعىتىندا جۇمىس ىستەيتىن SpaceX-كە ينۆەستورلاردىڭ قىزىعۋشىلىعى جوعارى بولىپ وتىر. جاڭا قارجىلاندىرۋ كومپانيانىڭ نارىقتاعى باعاسىن قايتا باعالاۋعا سەبەپ بولعان.
Forbes بۇرىن ماسكتىڭ بايلىعىن شامامەن 780 ملرد دوللار دەپ باعالاسا، SpaceX اكتسيالارىنىڭ قايتا ەسەپتەلۋىنەن كەيىن ونىڭ جالپى كاپيتالى 1,1 ترلن دوللارعا دەيىن جەتكەنى ايتىلادى.
ماسكتىڭ بايلىعىنىڭ نەگىزگى بولىگى SpaceX-تەگى ۇلەسىنە تيەسىلى. سونداي-اق ونىڭ اكتيۆتەرىنىڭ ىشىندە Tesla اكتسيالارى مەن باسقا دا ينۆەستيتسيالار بار.
ساراپشىلار Tesla كومپانياسىن الەمدە ەلەكتروموبيلدەر نارىعىنىڭ دامۋىن جەدەلدەتكەن نەگىزگى ويىنشىلاردىڭ ءبىرى دەپ سانايدى. قازىرگى تاڭدا كومپانيانىڭ نارىقتىق قۇنى دا 1 ترلن دوللاردان اسادى.
وڭتۇستىك افريكا رەسپۋبليكاسىندا تۋعان يلون ماسك كەيىن اقش-تا ءبىلىم الىپ، عارىش، كولىك، جاساندى ينتەللەكت جانە تسيفرلىق پلاتفورمالار سالالارىندا بىرنەشە ءىرى كومپانيا قۇرعان كاسىپكەر رەتىندە تانىلعان.
