ءبىرىنشى ينستانتسيا سوتى كورەيا رەسپۋبليكاسىنىڭ بۇرىنعى پرەزيدەنتى يۋن سوك ءيولدى پحەنيانعا اسكەري جاعداي ەنگىزۋگە نەگىز جاساۋ ماقساتىندا دروندار جىبەرگەنى ءۇشىن 30 جىلعا باس بوستاندىعىنان ايىردى. بۇل تۋرالى The Korea Herald اگەنتتىگى جازدى، دەپ حابارلايدى "ادىرنا".
سەۋلدىڭ ورتالىق وكرۋگتىك سوتى يۋن سوك ءيولدى جاۋعا كومەكتەسۋ جانە بيلىكتى اسىرا پايدالانۋ باپتارى بويىنشا كىنالى دەپ تانىدى. «جاۋعا كومەكتەسۋ» بابى اسكەري سالادا كحدر-عا تىكەلەي كەلىسىمسىز بولسا دا، وڭتۇستىك كورەيا مۇددەلەرىنە زيان كەلتىرىلگەن جاعدايدا قولدانىلادى. 2024 جىلدىڭ كۇزىندە وڭتۇستىك كورەيا اۋماعىنان پحەنيان ماڭىنا بىرنەشە درون جىبەرىلگەن، ولاردىڭ كەمىندە ءبىرى قۇلاپ، كحدر ينجەنەرلەرىنىڭ قولىنا تۇسكەن.
«اسكەري سالاداعى بۇل وپەراتسيانىڭ ەل مۇددەسىنە كەلتىرگەن زيانى اسا اۋىر بولماسا دا، ايىپتالۋشىلار سولتۇستىك كورەيانى ارانداتۋعا تىرىسىپ، اسكەري جاعداي جاريالاۋعا نەگىز جاساۋ ءۇشىن بۇل ارەكەتتى پايدالانعان»، – دەدى سۋديا.
سوتتىڭ پىكىرىنشە، بۇل ارەكەت سولتۇستىك كورەيانىڭ قوقىس سالىنعان شارلار جىبەرۋىنە جاۋاپ رەتىندە جاسالعان ءادىل قادام رەتىندە قاراستىرىلمايدى، ونىڭ ارتىندا مەملەكەتتىك قاۋىپسىزدىككە نەمەسە قورعانىسقا قاتىسى جوق جەكە مۇددەلەر تۇرعان.
2024 جىلدىڭ جەلتوقسانىندا يۋن سوك يول كونستيتۋتسيانى بۇزا وتىرىپ، اسكەري جاعداي جاريالاعان، كەيىن ول بيلىكتەن شەتتەتىلدى. سول جىلدىڭ كوكتەمى مەن جازىندا كحدر اۋماعىنان بەلسەندىلەر جىبەرگەن مەديتسينالىق زاتتار مەن ۇگىت ماتەريالدارىنا جاۋاپ رەتىندە قوقىس سالىنعان اۋە شارلارى جىبەرىلگەن.
ال اقپاندا ءبىرىنشى ينستانتسيا سوتى يۋن سوك ءيولدى اسكەري جاعداي وقيعالارىنا بايلانىستى مەملەكەتتىك قۇرىلىمعا قارسى بۇلىك جاساعانى ءۇشىن ءومىر بويىنا باس بوستاندىعىنان ايىرعان بولاتىن.
بۇرىن دا وڭتۇستىك كورەيانىڭ بىرنەشە پرەزيدەنتى ءارتۇرلى مەرزىمگە سوتتالعان. ولاردىڭ كەيبىرى كەيىن اقتالعان.
