وڭىرلىك جاستار فورۋمى جەزقازعان قالاسىندا جوعارى دەڭگەيدە ءوتتى. ءىس-شارا ۇلىتاۋ وبلىسى اكىمدىگى قولداۋىمەن جانە اۋىل پارتياسى وڭىرلىك فيليالىنىڭ ۇيىمداستىرۋىمەن جۇزەگە اسىرىلدى.
«تسيفرلاندىرۋ جانە جاساندى ينتەللەكت» تاقىرىبىن ارقاۋ ەتكەن فورۋمعا وبلىستىڭ تۇكپىر-تۇكپىرىنەن جينالعان جاستار قاتىسىپ، زاماناۋي تەحنولوگيالار مەن بولاشاق ماماندىقتار تۋرالى كەڭىنەن اقپارات الدى. فورۋم باعدارلاماسىنا سايكەس سەكتسيالىق جۇمىستار بارىسىندا IT جانە جاساندى ينتەللەكت باعىتتارى بويىنشا بىلىكتى سالا ماماندارى مازمۇندى دارىستەر وتكىزدى. سونىمەن قاتار، اۋىل جاستارى العىس حاتتارمەن ماراپاتتالىپ، پارتيا قاتارىنا جاڭادان قابىلدانعان جاستارعا پارتيالىق بيلەتتەر مەن توسبەلگىلەر تابىستالدى.
اتاپ ايتقاندا، مەرەكە باتىربەكوۆنا «اۋىل جاستارىنىڭ كەشەگى، بۇگىنى، ەرتەڭى» تاقىرىبىندا وي قوزعاپ، جاستار ساياساتىنىڭ ماڭىزىن اتاپ ءوتتى. ماۆلەن ايمى ساكەنقىزى جاساندى ينتەللەكت قۇرالدارى ارقىلى كونتەنت جاساۋ جولدارىن تۇسىندىرسە، ساۋكەنوۆ ولجاس ازاماتۇلى كيبەرقاۋىپسىزدىك پەن كيبەرگيگيەنا ماسەلەلەرىنە توقتالدى.
ينتەراكتيۆتى بولىمدە ءىنجۋتاس حانىم جاستارمەن ويىن فورماتىندا سەرگىتۋ جاتتىعۋلارىن وتكىزىپ، قاتىسۋشىلاردىڭ بەلسەندىلىگىن ارتتىردى.
سونىمەن قاتار، قاراتاەۆ الىبەك تۇرلىبەكوۆيچ جاستارعا جاساندى ينتەللەكت سالاسىنداعى مۇمكىندىكتەردى تانىستىرىپ، بولاشاق ماماندىقتى دۇرىس تاڭداۋدىڭ ماڭىزدىلىعى تۋرالى قۇندى پىكىرلەرىمەن ءبولىستى.
فورۋمنىڭ ارنايى قوناعى، headliner – ءمولدىر اۋەلبەكوۆا جاستارمەن ەركىن فورماتتا سۇحباتتاسىپ، ولاردىڭ سۇراقتارىنا جاۋاپ بەرىپ، تاجىريبەلىك كەڭەستەرىمەن ءبولىستى.
ءىس-شارا بارىسىندا قاتىسۋشىلار ءۇشىن قىزىقتى ويىندار ۇيىمداستىرىلىپ، ينتەراكتيۆتى فورماتتاعى سۇراق-جاۋاپ الاڭدارى ءوتتى. فورۋم جاستارعا جاڭا سەرپىن بەرىپ، ولاردىڭ كاسىبي جانە تۇلعالىق دامۋىنا باعىتتالعان ماڭىزدى الاڭعا اينالدى.
