وبلىس ورتالىعىندا جەزقازعان قالاسى اكىمدىگىنىڭ ۇيىمداستىرۋىمەن "ZHEZKAZGAN ALTYN KUZ" اتتى جارتىلاي مارافون ءوتتى. مارافونعا جالپى قازاقستاننىڭ تۇپكىر تۇپكىرىنەن جانە رەسەي، ۋكراينا، مانعوليا مەملەكەتتەرىنەن مارافونشىلار قاتىستى دەپ حابارلايدى جەزقازعان قالاسىنىڭ ءباسپاسوز قىزمەتى.
"ZHEZKAZGAN ALTYN KUZ" جۇگىرىسىنە ەلىمىزدەن بولەك، رەسەي، موڭعوليا جانە ۋكراينادان كەلگەن اۋەسقوي سپورتشىلار قاتىستى. جەزقازعان قالاسى اكىمىنىڭ ورىنباسارى ەرلان قۇسايىنوۆ مارافونعا قاتىسۋشىلارعا ساتتىلىك تىلەپ، مارافونشىلارمەن بىرگە جۇگىردى.
جارتىلاي مارافوندا قاتىسۋشىلار ەكى قاشىقتىق بويىنشا جۇگىردى. اتاپ ايتقاندا، 10,5 جانە 21,5 شاقىرىم ارالاعىن قۇرادى. ءداستۇرلى شارا وسىمەن 4-ءشى مارتە ۇيىمداستىرىلىپ وتىر. قاتىسۋشىلار اراسىندا جاستاردان بولەك، جاسى ەگدە تارتقان جاندار دا كوپ بولدى.
“شاعىن شاھاردا جەڭىل اتلەتيكانى دامىتۋ ماقساتىندا قولعا الىنعان مارافون - بىرتىندەپ قوعامدىق سيپات الدى. مارافوننىڭ باستى ماقساتى — بۇقارالىق سپورتتى دامىتۋ مەن سالاۋاتتى ءومىر سالتىن قالىپتاستىرۋ. بىزدىڭ قالامىزدا بۇقارالىق سپورتتى دامىتۋعا ەرەكشە كوڭىل بولىنۋدە، بۇگىنگى كۇنى وسىنداي اۋقىمدى دارەجەدە ءتورتىنشى رەت قالالىق جارتىلاي مارافون وتكىزىلىپ جاتىر جانە مارافونعا شەتەلدەن جانە باسقا قالالاردان سپورتشىلارىمىز قاتىسۋدا. بۇل قۋانتاتىن ءجايت. بۇل سپورتشىلارىمىزدىڭ سالاماتتى ءومىر سالتىن ۇستانۋعا دەگەن قىزىعۋشىلىعى ارتقانىن كورسەتەدى. بۇگىنگى جارىسقا 300-دەن اسا جەلاياق قاتىسۋدا. مارافونعا قاتىسۋشىلاردىڭ سانى جىل ساناپ وسۋدە. جارىستى جىل سايىن وتكىزۋ داستۇرگە اينالدى. كەلەسى جىلى جەزقازعان قالاسىنىڭ 70 جىلدىق مەرەيتويىندا بۇدان دا ۇلكەن دەڭگەيدە وتكىزۋ جوسپارلانۋدا”، - دەيدى جەزقازعان قالاسى سپورت ءبولىمىنىڭ باسشىسى زۋحراپ داۋمباەۆ.
2 ساعاتقا سوزىلعان جارتىلاي مارافون ءوز مارەسىنە جەتىپ، استانا، الماتى، قاراعاندى قالالارىنىڭ اۋەسقوي سپورتشىلارى العاشقى ۇشتىكتەن كورىندى. جەڭىمپازدارعا اقشالاي سىياقىلار مەن ماداقتاما قاعازى، ارنايى مەدال تابىس ەتىلدى.
