ۇلىتاۋ اكىمى قامقورشىلىق كەڭەستىڭ وتىرىسىنا قاتىستى

ۇلىتاۋ وبلىسىنىڭ اكىمى داستان رىسپەكوۆ «قازاقستان حالقىنا» قوعامدىق قورى قامقورشىلىق كەڭەسىنىڭ وتىرىسىنا قاتىستى. كەڭەس بارىسىندا ۇلىتاۋ وبلىسىنىڭ ءبىلىم بەرۋ سالاسىن دامىتۋعا ارنالعان «QH ء«بىلىم-يننوۆاتسيا» ليتسەيلەرىنىڭ تاجىريبەسىن ۇلىتاۋ وبلىسىنىڭ مەكتەپتەرىنە ەنگىزۋ» قايىرىمدىلىق جوباسى جانە جايرەم كەنتىندە دەنەشىنىقتىرۋ-ساۋىقتىرۋ كەشەنىن سالۋ ماسەلەلەرى قارالدى.

ءوڭىر باسشىسى ءوز سوزىندە وبلىستا الەۋمەتتىك ماڭىزى بار باستامالاردىڭ جۇزەگە اسۋىنا تۇراقتى قولداۋ كورسەتىپ كەلە جاتقان «قازاقستان حالقىنا» قوعامدىق قورىنا ريزاشىلىعىن ءبىلدىردى.

– بۇل جوبا وڭىرىمىزدەگى ساپالى بىلىمگە قولجەتىمدىلىكتى ارتتىرۋعا، پەداگوگتەردىڭ كاسىبي الەۋەتىن نىعايتۋعا جانە وقۋشىلاردىڭ ءبىلىم دەڭگەيىن كوتەرۋگە كەڭ مۇمكىندىك بەرەدى. ءبىز ءوز تاراپىمىزدان دا مەكتەپتەردىڭ ماتەريالدىق-تەحنيكالىق بازاسىن جاقسارتىپ، جوندەۋ جۇمىستارىن جۇرگىزىپ كەلەمىز. وسىنداي كەشەندى جۇمىستاردىڭ ناتيجەسىندە قالا مەن اۋىل مەكتەپتەرىنىڭ دامۋ مۇمكىندىگى ارتىپ، وڭىردەگى ءبىلىم ساپاسى جاڭا دەڭگەيگە كوتەرىلەدى دەپ سەنەمىز. سوندىقتان بۇل تاجىريبەنى وبلىس مەكتەپتەرىنە ەنگىزۋگە تولىق قولداۋ بىلدىرەمىز، – دەدى ءوڭىر باسشىسى داستان رىسپەكوۆ.

كەڭەس قورىتىندىسى بويىنشا ۇلىتاۋ وبلىسىنىڭ جايرەم كەنتىندە «قازاقستان حالقىنا» قوعامدىق قورىنىڭ قولداۋىمەن جاڭا دەنەشىنىقتىرۋ-ساۋىقتىرۋ كەشەنىن سالۋ تۋرالى كەلىسىمگە قول جەتكىزىلدى. جوبانىڭ جالپى قۇنى شامامەن 2,4 ملرد تەڭگەنى قۇرايدى. ونىڭ 1,7 ملرد تەڭگەسى «قازاقستان حالقىنا» قوعامدىق قورى تاراپىنان قارجىلاندىرىلسا، قالعان بولىگى جەرگىلىكتى بيۋدجەت ەسەبىنەن جۇزەگە اسىرىلادى.

جالپى اۋماعى 3250 شارشى مەتردى قۇرايتىن زاماناۋي سپورت كەشەنى 6–18 جاس ارالىعىنداعى 600 بالا مەن ءجاسوسپىرىمنىڭ سپورتپەن تۇراقتى اينالىسۋىنا مۇمكىندىك بەرەدى. نىسان پايدالانۋعا بەرىلگەننەن كەيىن 45 جاڭا جۇمىس ورنى اشىلادى.

ايتا كەتۋ كەرەك، بۇعان دەيىن دە «قازاقستان حالقىنا» قوعامدىق قورىنىڭ قولداۋىمەن ۇلىتاۋ وبلىسىنىڭ ساتباەۆ قالاسى مەن جاڭاارقا اۋدانىنداعى ەراليەۆ اۋىلىندا زاماناۋي سپورت نىساندارى سالىنعان بولاتىن. بۇدان بولەك، قور وڭىردە ءبىلىم بەرۋ، دەنساۋلىق ساقتاۋ جانە الەۋمەتتىك سالالاردى دامىتۋعا باعىتتالعان بىرقاتار ماڭىزدى جوبانى تابىستى جۇزەگە اسىرىپ كەلەدى.