بۇگىن ساتباەۆ قالاسىندا «ۇلىتاۋ جاستارى جاڭا كونستيتۋتسيانى قولدايدى» تاقىرىبىندا وڭىرلىك جاستار فورۋمى ءوتتى. اۋقىمدى شارا ش. دىلدەباەۆ اتىنداعى كەنشىلەر سارايىندا ۇيىمداستىرىلدى.
فورۋمنىڭ باستى ماقساتى – جاستار اراسىندا بەلسەندى ازاماتتىق ۇستانىمدى قالىپتاستىرۋ، جاڭا كونستيتۋتسيا جوباسىنىڭ نەگىزگى نورمالارىن كەڭىنەن ءتۇسىندىرۋ جانە ادىلەتتى، پروگرەسسيۆتى قازاقستان قۇرۋ جولىنداعى ورتاق قۇندىلىقتاردى ناسيحاتتاۋ.
«ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» وڭىرلىك كواليتسياسىنىڭ جوسپارى اسىندا وتكەن ءىس-شاراعا ءوڭىردىڭ بەلسەندى جاستارى، وندىرىستىك كاسىپورىنداردىڭ جاس ماماندارى، قوعامدىق ۇيىم وكىلدەرى، جاستار بىرلەستىكتەرى مەن قالا تۇرعىندارى قاتىسىپ، بارلىعى 500-گە جۋىق ادام جينالدى.
فورۋم بارىسىندا سپيكەرلەر جاڭا كونستيتۋتسيانىڭ ادام قۇقىقتارى مەن بوستاندىقتارىن قورعاۋ، زاڭ ۇستەمدىگىن نىعايتۋ، جاستار ساياساتىن قولداۋ باعىتىنداعى باسىمدىقتارىنا توقتالدى. سونىمەن قاتار ينتەراكتيۆتى فورماتتاعى پىكىرتالاستار، ۆيكتورينالار جانە مادەني باعدارلاما ۇيىمداستىرىلىپ، قاتىسۋشىلاردىڭ بەلسەندى ارالاسۋىنا مۇمكىندىك جاسالدى.
سونداي-اق ەڭبەك قاتىناستارى، ءبىلىم بەرۋ جانە دەنساۋلىق ساقتاۋ سالالارىنداعى مەملەكەتتىك كەپىلدىكتەر ءتۇسىندىرىلدى. قاتىسۋشىلارعا ازاماتتاردىڭ ەڭبەك قۇقىقتارى، تەگىن ءبىلىم الۋ مۇمكىندىكتەرى جانە كەپىلدەندىرىلگەن مەديتسينالىق كومەك جونىندە ناقتى اقپارات بەرىلدى.
شارا قورىتىندىسىندا جاستار جاڭا كونستيتۋتسيانى قولداۋ – ەل بولاشاعىنا جاسالعان ماڭىزدى ءارى جاۋاپتى قادام ەكەنىن اتاپ ءوتتى. فورۋم ءوڭىر جاستارىن بىرىكتىرىپ، قۇقىقتىق مادەنيەتتى ارتتىرۋعا جانە ازاماتتىق جاۋاپكەرشىلىكتى كۇشەيتۋگە سەرپىن بەردى.
