ۇلىتاۋ وبلىسىنىڭ جاڭاارقا اۋدانىندا قازاق حالقىنىڭ باي مۇراسى مەن ۇلتتىق قۇندىلىقتارىن ۇلىقتايتىن ءداستۇرلى «كوكمايسا – دالانىڭ ءتىرى تاريحى» ەتنوفەستيۆالى باستالدى. وڭىردە ءبىر مەزەتتە 35 كيىز ءۇي تىگىلىپ، 15 مىڭعا جۋىق قوناق جينالدى.
اۋقىمدى مادەني ءىس-شاراعا ۇلىتاۋ وبلىسىنىڭ اكىمى داستان رىسپەكوۆ قاتىسىپ، فەستيۆال الاڭىنداعى نەگىزگى كورمە جانە ەتنوايماقتاردى ارالادى.
فەستيۆالدىڭ العاشقى باعدارلاماسى تاڭعى ساعات 09:30-دا كرەاتيۆتى ايماقپەن تانىسۋدان باستالدى. ودان كەيىن «كوكمايسا – دالانىڭ ءتىرى تاريحى» ۇلتتىق تاعامدار مەن سالت-داستۇرلەر فەستيۆالىنىڭ سالتاناتتى اشىلۋ ءراسىمى ءوتىپ، ءوڭىر باسشىسى جينالعان جۇرتشىلىقتى مەرەكەمەن قۇتتىقتادى.
– «كوكمايسا» – وبلىسىمىزدىڭ برەندىنە اينالعان ەرەكشە فەستيۆال. بيىل ول ون ءبىرىنشى رەت ۇيىمداستىرىلىپ وتىر. وسى ۋاقىتقا دەيىن بۇل يگى ءداستۇر ۇلىتاۋ اۋدانىندا وتكىزىلىپ كەلسە، بيىل العاش رەت جاڭاارقا جەرىندە جالعاسىن تاپتى. مۇندا الىس-جاقىن شەتەلدەردەن قوناقتار قىزىعۋشىلىق تانىتىپ ارنايى كەلىپ وتىر. بۇل ءبىز ءۇشىن ۇلكەن مارتەبە. ، – دەدى ۇلىتاۋ وبلىسىنىڭ اكىمى داستان رىسپەكوۆ.
فەستيۆالدىڭ ەڭ اسەرلى ساتتەرىنىڭ ءبىرى – ءبىر مەزەتتە 500 بيەنىڭ ساۋىلۋى بولدى. بۇل كورىنىس ۇلتتىق ءداستۇردىڭ ومىرشەڭدىگىن ايشىقتاپ، جينالعان جۇرتشىلىقتىڭ ەرەكشە ىقىلاسىنا بولەندى.
سونىمەن قاتار قازاق حالقىنىڭ كونە «قىمىزمۇرىندىق» ءداستۇرى ساحنالانىپ، اۋىل اقساقالدارى اق باتاسىن بەردى. قوناقتار مەن كورەرمەندەرگە جاڭا ساۋىلعان قىمىز ۇسىنىلىپ، ۇلتتىق ويىندار مەن ءداستۇرلى ونەر كورسەتىلىمدەرى ۇيىمداستىرىلدى.
بۇدان كەيىن وبلىس اكىمى ەلىمىزدىڭ ءار وڭىرىنەن كەلگەن ەتنواۋىلداردى ارالاپ، كيىز ۇيلەر كورمەسىمەن تانىستى. ۇلتتىق تاعامداردان ءدام تاتىپ، سالت-ءداستۇر كورىنىستەرىن تاماشالادى جانە قولونەر شەبەرلەرىنىڭ تۋىندىلارىن كورىپ، ولاردىڭ ەڭبەگىنە جوعارى باعا بەردى.
فەستيۆال اياسىندا ۇلتتىق سپورت تۇرلەرىنەن دە تارتىستى جارىستار ءوتتى. قوناقتار كوكپار، اۋدارىسپاق، قازاق كۇرەسى، ءداستۇرلى ساداق اتۋ، اسىق اتۋ، جىلىك سىندىرۋ، قوشقار كوتەرۋ جانە ارقان تارتىس سەكىلدى ۇلتتىق ويىنداردىڭ قىزىعىنا كۋا بولدى.
كۇننىڭ ەكىنشى جارتىسىندا ۇلتتىق سپورت جەڭىمپازدارى مەن قۇراق كورپە تىگۋدىڭ ۇزدىك شەبەرلەرىن ماراپاتتاۋ ءراسىمى وتەدى.
مەرەكەلىك شارا كەشكى گالا-كونتسەرتپەن قورىتىندىلانادى. ساحنادا قازاقستاندىق ەسترادا جۇلدىزدارى – ۇشقىن جامالبەك، وزگەرىس جەرىكباي جانە JOSHY QAZAQ NATIONAL GROUP ونەر كورسەتەدى.
«كوكمايسا – دالانىڭ ءتىرى تاريحى» ەتنوفەستيۆالى – حالقىمىزدىڭ سالت-ءداستۇرىن، ۇلتتىق تاعامدارىن، قولونەرىن جانە ەتنومادەني مۇراسىن كەڭىنەن دارىپتەپ، ۇلتتىق بىرەگەيلىكتى نىعايتاتىن تاعىلىمى مول مادەني جوبا. بۇل فەستيۆال ۇلت رۋحانياتىن ۇلىقتاپ قانا قويماي، ءوڭىردىڭ تۋريستىك الەۋەتى مەن مادەني كەلبەتىن ايشىقتايتىن ماڭىزدى شارا رەتىندە ءوز مارتەبەسىن جىل سايىن ارتتىرىپ كەلەدى.
