فوتو: دميتري ەروفەەۆ
بۇگىن وبلىس اكىمى بەيبىت يساباەۆ كوكسۋ اۋدانىنا جۇمىس ساپارىمەن بارىپ، كوكتەمگى ەگىس جۇمىستارىنىڭ بارىسىن كوردى. سول سياقتى جاڭا اگروتەحنولوگيانى پايدالانۋ ارقىلى وڭىردەگى ونىمدىلىكتى كوتەرۋ شارالارىمەن تانىستى، دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
لاباسى اۋىلدىق وكرۋگىندە ورنالاسقان «مىرزاحان» شارۋا قوجالىعىندا 85 گا جەرگە داندىك جۇگەرى ەگىلۋدە. اتالمىش شارۋاشىلىق 4 جىلدان بەرى «Global Agro» كومپانياسى» جشس-مەن بىرلەسىپ جۇمىس ىستەپ كەلەدى. سەرىكتەستىكتىڭ اگرونومدارىمەن كەڭەسە وتىرىپ، كومپانيانىڭ تۇقىمىن، مينەرالدى تىڭايتقىشتارىن قولدانىپ، جاقسى ونىمدىلىككە قول جەتكىزىپ ءجۇر. وسى شارۋاشىلىقتىڭ مىسالىندا وبلىستىق اۋىل شارۋاشىلىعى باسقارماسىنىڭ باسشىسى نۇرداۋلەت كەنەنباەۆ داندىك جۇگەرى ەگۋ بويىنشا وڭىردە اتقارىلىپ جاتقان جۇمىستاردى بايانداپ بەردى.
- جالپى وبلىس بويىنشا بيىل داندىك جۇگەرىنى باسىمدىق بەرەتىن داقىل رەتىندە بىلتىرعىدان 5 مىڭ گەكتارعا ارتىق سەپكەلى وتىرمىز. ويتكەنى بۇل ونىمگە وڭدەۋ زاۋىتتارى مەن قۇس فابريكالارى تاراپىنان سۇرانىس بار. ونىڭ ۇستىنە بۇل جۇگەرى داقىلىنىڭ ونىمدىلىگىن كوتەرۋ ءۇشىن بىرنەشە كومپانيامەن جۇمىس ىستەپ، ءتۇرلى اگروتەحنولوگيا قولدانىپ جاتىرمىز. سونىڭ ىشىندە «مىرزاحان» شارۋا قوجالىعى «Global Agro» كومپانياسىنىڭ جاڭا تۇقىمى مەن جاڭا اگروتەحنولوگياسىن پايدالانۋ ارقىلى بىلتىر گەكتارىنا 140 تسەنتنەردەن ءونىم الدى، بۇل - وبلىس كولەمىندە رەكوردتىق كورەتكىش. بيىل 10 گەكتارعا قىتايلىق تۇقىمدى ەكسپەريمەنت رەتىندە سەپكەلى وتىر. بۇل تۇقىمنىڭ ەرەكشەلىگى - اۋا رايىنىڭ ءتۇرلى قيىندىقتارىنا توزىمدىلىگى جاقسى جانە پوتەنتسيالى 15 توننا. ءوزىنىڭ مينەرالدىق تىڭايتقىشتار قوسپاسى بار. بۇل ونىڭ باستاپقى فازاسىندا داندىك جۇگەرى تامىرىنىڭ قالىپتاسۋىنا، بويىنىڭ وسۋىنە ۇلكەن ىقپالىن تيگىزەدى، - دەدى نۇرداۋلەت كەنەنباەۆ.
اتاپ وتسەك، «مىرزاحان» شارۋا قوجالىعىندا 25 ادام جۇمىس ىستەيدى. شاۋراشىلىقتىڭ 97 گەكتار جەرىنىڭ 85,5 گەكتارىنا داندىك جۇگەرى، 11,5 گا جەرگە مال ازىعى داقىلدارى وسىرىلەدى. بيىل دا جۇگەرىدەن وتكەن جىلعىدان كەم ەمەس – شامامەن 120-140 تسن/گا ءونىم جيناۋدى جوسپارلاپ وتىر.
القاپتاعى جۇمىس بارىسىن كورگەن وبلىس باسشىسى بەيبىت يساباەۆ كوكتەمنىڭ ءاربىر كۇنىن ءتيىمدى پايدالانىپ، ەگىس ناۋقانىن ۋاقىتىلى، ساپالى جۇرگىزۋدى، سول سياقتى زاماناۋي اگروتەحنولوگيالاردىڭ مۇمكىندىكتەرىن قولدانۋ تيىمدىلىگىن شارۋاشىلىقتارعا كەڭىنەن تاراتۋدى تاپسىردى.
ەسكە سالساق، وسى جىلى جالپى ەگىس كولەمى 511,8 مىڭ گەكتاردى قۇراماق. سونىڭ ىشىندە بۇگىنگە دەيىن ماساقتى ءداندى داقىلدار 115,4 مىڭ گەكتارعا، داندىك جۇگەرى 8,6 مىڭ گەكتارعا، مايلى داقىلدار 29,5 مىڭ گەكتارعا، كارتوپ 1,1 مىڭ گەكتارعا، قانت قىزىلشاسى 7,8 مىڭ گەكتارعا، كوكونىس 657 گەكتارعا، باقشا داقىلدارى 129 گەكتارعا، مال ازىقتىق داقىلدار 23,9 مىڭ گەكتارعا سەبىلدى.
سونىمەن قاتار كوكتەمگى دالا جۇمىستارىنا مينەرالدىق تىڭايتقىشتار، ارزانداتىلعان ديزەل وتىنى، سونداي-اق «كەڭ دالا» باعدارلاماسى بويىنشا نەسيەلەر بەرىلۋدە. وعان قوسا «قازاگروقارجى» فيليالى ارقىلى 184 تەحنيكا ساتىپ الىندى.
