جەتىسۋ وبلىسىندا رەسپۋبليكالىق «تازا قازاقستان» ەكولوگيالىق باعدارلاماسى اياسىندا مەكتەپ تۇلەكتەرىنىڭ قاتىسۋىمەن اۋقىمدى اعاش جانە گۇل كوشەتتەرىن وتىرعىزۋ اكتسياسى ءوتتى.
ەكولوگيالىق باستاما جاستاردىڭ تۋعان جەرگە دەگەن سۇيىسپەنشىلىگىن ارتتىرىپ، تابيعاتتى ايالاۋ مادەنيەتىن قالىپتاستىرۋعا باعىتتالدى.
يگى شاراعا وبلىس بويىنشا جالپى سانى 32 023 تۇلەك قاتىستى. مەكتەپ ءبىتىرۋشى جاستار تۋعان ولكەسىنىڭ كوركەيۋىنە ءوز ۇلەستەرىن قوسىپ، بولاشاققا دەگەن ىزگى نيەتتەرىن جاسىل جەلەك وتىرعىزۋ ارقىلى جەتكىزدى.
اكتسيا ناتيجەسىندە ءوڭىر اۋماعىندا 1 352 اعاش جانە 2 389 گۇل كوشەتى وتىرعىزىلدى. ءسويتىپ مەكتەپ بىتىرۋشىلەردىڭ ءوز قولدارىمەن ەككەن كوشەتتەرى ولاردىڭ تۋعان مەكتەپتەرىمەن، بالالىق شاعىمەن جانە تۋعان ولكەسىمەن بايلانىسىنىڭ سيمۆولىنا اينالدى.
ءىس-شاراعا ارنايى بارعان جەتىسۋ وبلىسى اكىمىنىڭ ورىنباسارى مارلەن كولباەۆ تالدىقورعانداعى ن. وستروۆسكي اتىنداعى №8 ورتا مەكتەپ پەن ب. جولبارىسۇلى اتىنداعى №18 ورتا مەكتەپ تۇلەكتەرىمەن بىرگە كوشەت وتىرعىزۋ راسىمىنە قاتىستى.
كەزدەسۋ بارىسىندا وبلىس اكىمىنىڭ ورىنباسارى جاستاردىڭ ەكولوگيالىق باستاماسىنا جوعارى باعا بەرىپ، ولاردىڭ تۋعان جەردىڭ دامۋىنا قوسىپ جاتقان ۇلەسى ماڭىزدى ەكەنىن اتاپ ءوتتى. سونداي-اق جاس ۇرپاقتى تابيعاتتى قورعاۋعا، قورشاعان ورتاعا جاناشىرلىقپەن قاراۋعا شاقىردى.
سونىمەن قاتار «ادەپ-قۇقىق جۇمىس جونىندەگى مەنتور» جوباسى اياسىندا مەكتەپ وقۋشىلارىنا ارنالعان ارنايى ءدارىس ساعاتتارى ۇيىمداستىرىلىپ، قۇقىقتىق مادەنيەت، جاۋاپكەرشىلىك جانە قوعامدىق ءتارتىپ تاقىرىپتارى كەڭىنەن ءتۇسىندىرىلدى.
–بۇگىن وتىرعىزعان كوشەتىمىز – ءبىزدىڭ مەكتەپپەن قوشتاسقان ءساتىمىزدىڭ ەستەلىگى عانا ەمەس، تۋعان جەرىمىزگە دەگەن قۇرمەتىمىزدىڭ بەلگىسى. جىلدار وتە بۇل اعاشتار ءوسىپ، گۇلدەنگەن كەزدە ءبىز دە ومىردە ءوز ورنىمىزدى تابامىز دەپ سەنەمىن, – دەدى نۇرقاسىم مۋبينا.
ەكولوگيالىق اكتسيا اياسىنداعى ءىس-شارالار مۇنىمەن شەكتەلمەي، تالدىقورعان قالاسىندا كاسىپتىك-تەحنيكالىق ءبىلىم بەرۋ ۇيىمدارىنىڭ ستۋدەنتتەرى اراسىندا «Student CUP» شاعىن فۋتبول ءتۋرنيرى ۇيىمداستىرىلدى. ءتۋرنيردىڭ ماقساتى – جاستار اراسىندا سالاۋاتتى ءومىر سالتىن ناسيحاتتاپ، سپورت پەن ەكولوگيالىق مادەنيەتتى ۇشتاستىرۋ بولدى.
جارىسقا 14-35 جاس ارالىعىنداعى جوعارى سىنىپ وقۋشىلارى، كوللەدج جانە جوعارى وقۋ ورنى ستۋدەنتتەرىنەن قۇرالعان 8 كوماندا قاتىسىپ، تارتىستى ويىن ورنەگىن كورسەتتى. قورىتىندىسىندا ۇزدىك كوماندالار ديپلومدارمەن، العىس حاتتارمەن جانە ەستەلىك سىيلىقتارمەن ماراپاتتالدى.
ۇيىمداستىرۋشىلاردىڭ ايتۋىنشا، مۇنداي يگى باستامالار جاستاردىڭ تابيعاتقا دەگەن جاناشىرلىعىن ارتتىرىپ قانا قويماي، جاۋاپكەرشىلىك، ۇيىمشىلدىق جانە بەلسەندى ازاماتتىق ۇستانىم قالىپتاستىرۋعا ىقپال ەتەدى.
«تازا قازاقستان» باعدارلاماسى اياسىندا وتكەن بۇل اكتسيا ەكولوگيالىق مادەنيەتتى دارىپتەگەن، جاستاردى ورتاق ىسكە جۇمىلدىرعان جانە جەتىسۋدىڭ جاسىل كەلبەتىن قالىپتاستىرۋعا باعىتتالعان تاعىلىمدى باستامالاردىڭ ءبىرى بولدى.
