پارلامەنت سەناتىنىڭ توراعاسى ماۋلەن اشىمباەۆ باستاعان اەس سالۋدى قولداۋ جونىندەگى حالىق شتابىنىڭ مۇشەلەرى جەتىسۋ وبلىسىنا كەلىپ، ءوڭىر جۇرتشىلىعىمەن الداعى رەفەرەندۋمعا قاتىستى وزەكتى ماسەلەلەردى جانە ەنەرگەتيكا سالاسىن دامىتۋ پەرسپەكتيۆالارىن تالقىلادى. ساپار بارىسىندا دەپۋتاتتار ساراپشىلارمەن جانە قوعام قايراتكەرلەرىمەن بىرگە وبلىستاعى وندىرىستىك كاسىپورىنداردىڭ ەڭبەك ۇجىمدارىمەن، سونداي-اق، بەلسەندى جاستارمەن كەزدەستى.
ماۋلەن اشىمباەۆ ءوز سوزىندە قازىرگى سىن-قاتەرلەر جاعدايىندا بالامالى ەنەرگيا كوزدەرىنىڭ قاجەتتىلىگى بۇرىنعىدان دا ارتا تۇسكەنى ايقىن بايقالىپ وتىرعانىن اتاپ ءوتتى. وعان كليماتتىڭ وزگەرۋى، ەكولوگيانىڭ ناشارلاۋى جانە ەنەرگيانىڭ تاپشىلىعىنا قاتىستى ستاتيستيكالار دالەل. سەنات توراعاسى بۇل رەتتە مەملەكەت باسشىسى ماقۇلداعان اتوم ەلەكتر ستانساسىن سالۋ تۋرالى باستاما اسا ماڭىزدى ەكەنىن ايتتى. اتالعان جوبانىڭ نەگىزگى ارتىقشىلىقتارىنىڭ ءبىرى – كومىرقىشقىل گازىنىڭ شىعارىندىلارىن ازايتۋ جانە كومىرگە تاۋەلدىلىكتى تومەندەتۋ.
«بۇگىندە حالىقتىڭ تۇتىنۋ قاجەتتىلىگىن وتەپ وتىرعان كومىر ەلەكتر ستانسالارىنىڭ جاعدايى سىن كوتەرمەيدى، باسىم بولىگى ابدەن توزعان. قازىردىڭ وزىندە ەلىمىزدە ەنەرگيا تاپشىلىعى ورىن الىپ، سەنىمدى جانە تازا قۋات كوزدەرىنىڭ قاجەتتىلىگى ارتىپ وتىر. پرەزيدەنتىمىز قاسىم-جومارت كەمەلۇلى توقاەۆ حالىققا جولداۋىندا وسى تۇيتكىلگە ەرەكشە توقتالدى. شىن مانىندە، بۇل رەتتە اتوم ەنەرگياسىنىڭ الەۋەتى زور. قازىر ول بۇكىل الەمدە بەلسەندى قولدانىلىپ كەلەدى. اەس-ءتىڭ كومىر ستانسالارىنان ايتارلىقتاي ايىرماشىلىعى بار. ول اۋانى جانە قورشاعان ورتانى كومىرقىشقىل گازدارىمەن، كۇلمەن نەمەسە قۇرامىندا مۇناي ونىمدەرى بار زياندى قالدىقتارمەن لاستامايدى. بۇل – تابيعاتقا زيان كەلتىرمەي-اق ەكونوميكامىزدىڭ قارقىندى دامۋىنا ىقپال ەتەتىن تازا جانە تۇراقتى ەنەرگيا كوزى»، – دەدى پالاتا سپيكەرى.
سونىمەن قاتار شتاب مۇشەلەرى اقپاراتتىق جۇمىس اياسىندا «ايسۇلۋ» تىگىن فابريكاسىنىڭ ۇجىمىمەن كەزدەستى. مۇندا كوپ بالالى انالار، مۇمكىندىگى شەكتەۋلى جاندار جانە الەۋمەتتىك از قامتىلعان ساناتتاعى باسقا دا ازاماتتار جۇمىس ىستەيدى. كەزدەسۋدە ولار اەس سالۋ باستاماسىن تولىق قولداپ، ءوز پىكىرلەرىن ءبىلدىردى.
قازاقستانداعى نەگىزگى بەتون وندىرۋشىلەردىڭ ءبىرى، قالا قۇرىلىسىمەن اينالىساتىن «تەمىربەتون» كاسىپورنىنىڭ قىزمەتكەرلەرى دە اتالعان يدەيانى قولدايتىندارىن جەتكىزدى.
ءوڭىر جۇرتشىلىعىمەن جانە بەلسەندى جاستارمەن كەزدەسۋدە وندىرىسكە قاجەتتى جاڭا تاسىلدەردى زەردەلەۋدىڭ جانە يننوۆاتسيالىق تەحنولوگيالاردى ەنگىزۋدىڭ ماڭىزى ءسوز بولدى. ماۋلەن اشىمباەۆ اتاپ وتكەندەي، قازىرگى اتوم ەلەكتر ستانسالارى سەنىمدى، ادام ومىرىنە قاۋىپسىز، ەڭ وزىق جانە تەكسەرىلگەن تەحنولوگيالار نەگىزىندە سالىنىپ جاتىر.
سونداي-اق سەنات توراعاسى اەس-ءتىڭ جۇمىسى مەن ونى پايدالانۋ كەزەڭىندە حالىقارالىق ساراپتامالىق ۇيىمدار تاراپىنان سەنىمدى باقىلاۋعا كەپىلدىك بەرىلگەنىنە توقتالىپ، ازاماتتاردى ەل يگىلىگى ءۇشىن رەفەرەندۋمعا بەلسەندى قاتىسۋعا شاقىردى.
«ەكونوميكانىڭ ۇزاق مەرزىمدى مۇددەلەرىنە جانە قاجەتتىلىكتەردىڭ جەدەل ارتۋىنا بايلانىستى اەس سالۋ ماسەلەسى ستراتەگيالىق سيپاتتا يە ەكەنىن كورىپ وتىرمىز. سوندىقتان حالىقتىڭ بۇل ماسەلەگە قولداۋ ءبىلدىرۋى ەلىمىزدىڭ دامۋى جولىندا اسا ماڭىزدى. اتوم ەلەكتر ستانساسىن سالۋ كەزىندەگى نەگىزگى باسىمدىق ادامداردىڭ قاۋىپسىزدىگى ەكەنى انىق. سول سەبەپتى، قازاقستاندىقتار قولداپ داۋىس بەرسە، اەس ەڭ جوعارى حالىقارالىق ستاندارتتارعا سايكەس سالىنادى. جوبانى ىسكە اسىرۋ كەزىندە تابيعي اپاتتار مەن باسقا دا ىقتيمال سىن-قاتەرلەردىڭ الدىن الۋعا قاجەتتى شارالار مىندەتتى تۇردە ەسكەرىلەدى. ستانسانىڭ قاۋىپسىز جۇمىسىن ماگاتە مەن باسقا دا حالىقارالىق ۇيىمدار مۇقيات قاداعالايدى»، – دەدى ماۋلەن اشىمباەۆ.
