جەتىسۋ وبلىسىنىڭ بالپىق بي اۋىلىندا ارقايسىسى 60 پاتەرلىك بەس قاباتتى ەكى ءۇيدىڭ قۇرىلىسى ءجۇرىپ جاتىر. سول سياقتى بوزتوعان اۋىلىنداعى مەكتەپ كۇردەلى جوندەۋدەن وتكىزىلۋدە. بۇگىن كوكسۋ اۋدانىنا بارعان ساپارى بارىسىندا وبلىس اكىمى بەيبىت يساباەۆ اتالعان قۇرىلىس الاڭدارىندا بولىپ، جۇمىستىڭ ساپاسىن كوردى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
بوزتوعان اۋىلىنداعى مۇسابەك اتىنداعى ورتا مەكتەپ 1987 جىلى سالىنعان. مۇنداعى جوندەۋ جۇمىستارى وتكەن جىلدىڭ مامىر ايىندا باستالعان بولاتىن. سونىڭ اياسىندا سەيسميكالىق نىعايتۋ، سىنىپتاردى زامان تالابىنا ساي جاڭارتۋ جۇمىستارى اتقارىلدى. قازىرگى كەزدە نىساننىڭ دايىندىعى - 95 پايىز.
ءبىلىم وشاعىنىڭ ىشكى كەيپىمەن تانىستىرعان مەكتەپ ديرەكتورى شولپان نۇرعازينوۆا قازىر قاجەتتى جيھازدار مەن جابدىقتار اكەلىنىپ جاتقانىن ايتتى. بەيبىت يساباەۆ مەكتەپتىڭ سپورت زالىن، ءماجىلىس زالىن، اسحاناسىن، ءپان كابينەتتەرى مەن سىرتتاعى ويىن جانە سپورت الاڭدارىن ارالاپ كوردى. ۇلكەن مەكتەپتە قازىرگى تاڭدا 420-دان استام وقۋشى وقيدى. بۇل رەتتە ءوڭىر باسشىسى الداعى وقۋ جىلىن دۇرىس جوسپارلاپ، مەكتەپتى كۇتىپ ۇستاۋدى ءتيىمدى ۇيىمداستىرۋدى تاپسىردى.
سول سياقتى بالپىق بي اۋىلىندا ءبىر جەردە قاتار سالىنىپ جاتقان قوس ءۇيدىڭ قۇرىلىسى قارقىندى ءجۇرىپ جاتىر. قۇرىلىس ۋچاسكەسىنىڭ باستىعى جاقسىلىق وتەگەنۇلىنىڭ ايتۋىنشا، قاجەتتى ماتەريالدار تۇگەل جەتكىزىلگەن. قۇرىلىس جۇمىستارىن تامىزدىڭ سوڭىنا دەيىن تولىق اياقتاۋ جوسپارلانىپ وتىر.
- قازىرگى تاڭدا ءبىر ءۇيدىڭ شاتىرىن جاۋىپ جاتىرمىز. ال ەكىنشى ءۇيدىڭ ىشكى بولمەلەرىن ءبولۋ جۇمىستارى جۇرگىزىلۋدە. قۇرىلىس الاڭىندا 80-دەي ادام جۇمىس ىستەپ جاتىر، - دەدى ول.
وبلىس اكىمى ءۇيدىڭ ىشكى قۇرىلىستارىنىڭ بارىسىن قاراپ، سىرتقى قاسبەتىنىڭ ەسكيزىن كوردى. تۇرعىن ۇيدە مۇمكىندىگى شەكتەۋلى ازاماتتارعا ارنالعان پاندۋس، ارنايى كوتەرگىش بولۋى، سول سياقتى ينجەنەرلىك جۇيەلەرگە دەر كەزىندە قوسۋ كەرەكتىگىن ەسكەرتتى. «ەڭ باستىسى قۇرىلىستىڭ ساپالى بولۋىنا ەرەكشە نازار اۋدارۋ كەرەك» - دەدى ب. يساباەۆ.
اتاپ وتسەك، ءار ۇيدە 30 ءۇش بولمەلى، 15 ەكى بولمەلى، 15 ءبىر بولمەلى پاتەر بار. بۇل تۇرعىن ۇيلەر قۇرىلىسى اياقتالعان سوڭ «وتباسى بانك» اق ارقىلى اۋداندا كەزەكتە تۇرعان ازاماتتارعا بەرىلەدى دەپ جوسپارلانعان.
