2025 جىلدىڭ قورىتىندىسى بويىنشا جەتىسۋ وبلىسىندا نەگىزگى سالالاردىڭ بارلىعىندا، ونىڭ ىشىندە قۇرىلىستا جانە حالىقتى قولجەتىمدى تۇرعىن ۇيمەن قامتاماسىز ەتۋ باعىتىندا تۇراقتى وسىمگە قول جەتكىزىلدى. اتاپ ايتقاندا، 412,8 مىڭ شارشى مەتر تۇرعىن ءۇي پايدالانۋعا بەرىلدى. بۇل كورسەتكىش 2024 جىلمەن سالىستىرعاندا 11%-عا ارتقان.
وسى ورايدا كەربۇلاق اۋدانىنىڭ سارىوزەك اۋىلىندا «سامۇرىق-قازىنا» ينۆەستيتسيالىق حولدينگىنىڭ قاراجاتى ەسەبىنەن سالىنعان 5 قاباتتى 60 پاتەرلى تۇرعىن ءۇي پايدالانۋعا بەرىلدى. جاڭا پاتەر كىلتتەرى الەۋمەتتىك وسال ساناتتاعى ازاماتتارعا تابىستالدى. ولاردىڭ قاتارىندا كوپ بالالى جانە تولىق ەمەس وتباسىلار، مۇمكىندىگى شەكتەۋلى بالالارى بار نەمەسە ولاردى تاربيەلەپ وتىرعان وتباسىلار، جەتىم بالالار، اتا-اناسىنىڭ قامقورلىعىنسىز قالعان بالالار، سونداي-اق مۇگەدەكتىگى بار ازاماتتار بار.
– مەن 2017 جىلدان بەرى تۇرعىن ءۇي كەزەگىندە تۇرعانمىن. ەكى بالامدى جالعىز ءوزىم تاربيەلەپ كەلەمىن. ءبىزدىڭ وتباسىمىز ءۇشىن جاڭا جىل جاعىمدى جاڭالىقپەن باستالىپ، بىزگە ەكى بولمەلى پاتەردىڭ كىلتى بەرىلدى. ەندى ءوز باسپانامىز بار، بۇل ءبىز ءۇشىن ايتۋلى قۋانىش، – دەپ وي ءبولىستى جاڭا قونىس يەلەرىنىڭ ءبىرى ورىنباسار قالاليەۆا.
ونىڭ ءسوزىن سارىوزەك اۋىلىنىڭ تاعى ءبىر تۇرعىنى ەركەگۇل جومارتبەك تە قوستادى:
– مەن ءىىى توپتاعى مۇگەدەكپىن. مەملەكەتتىك تۇرعىن ءۇي قورىنان باسپانا الۋ كەزەگىندە تۋرا ون جىل، ياعني 2016 جىلدان بەرى تۇردىم. بۇگىندە وتباسىمىزدىڭ ءوز شاڭىراعى بولعانىنا وتە قۋانىشتىمىن. مەنىڭ ءۇش قىزىم بار، جاڭا پاتەردە بارلىعىنا كەڭ ءارى جايلى بولادى، ويتكەنى بىزگە ءۇش بولمەلى پاتەر بەرىلدى. بارلىق جاڭا قونىستانۋشىلاردى شىن جۇرەكتەن قۇتتىقتايمىن جانە وسى يگى، ساۋاپتى ىسكە اتسالىسقان بارشا ازاماتتارعا العىسىمدى بىلدىرەمىن، – دەدى ول.
سارىوزەك اۋىلىنىڭ تاعى ءبىر تۇرعىنى ەركەگۇل جومارتبەك تە وسىنداي پىكىردە:
– مەن ءىىى توپتاعى مۇگەدەكپىن. مەملەكەتتىك تۇرعىن ءۇي قورىنان باسپانا الۋ كەزەگىندە تۋرا ون جىل، ياعني 2016 جىلدان بەرى تۇردىم. قازىر وتباسىمىز جاڭا پاتەرىنە يە بولدى. مەنىڭ ءۇش قىزىم بار، بىزگە بەرىلگەن ءۇش بولمەلى پاتەر بالالارىم ءۇشىن كەڭ ءارى جايلى بولاتىنى قۋانتادى. بارلىق جاڭا كورشىلەرىمدى شىن جۇرەكتەن قۇتتىقتايمىن، وسى يگى ىسكە ۇلەس قوسقان بارشا جاندارعا العىسىمدى بىلدىرەمىن، – دەدى ول.
اتاپ وتسەك، وتكەن جىلدىڭ قورىتىندىسى بويىنشا جەتىسۋ وبلىسىندا كەزەكتە تۇرعان 2166 ازاماتقا بەرىلەتىن تۇرعىن ءۇي دايىندالدى، سونىڭ 1002-ءسى جاڭا قونىسقا كىردى، بۇل رەتتە تۇرعىن ءۇي ءبولۋ فۋنكتسياسى وتكەن جىلدىڭ مامىر ايىنان "وتباسى بانككە" بەرىلگەن بولاتىن.
