قاتار مەملەكەتىنە رەسمي ساپارى اياسىندا قازاقستان رەسپۋبليكاسىنىڭ سىرتقى ىستەر ءمينيسترى ەرمەك كوشەرباەۆ قاتار مەملەكەتىنىڭ پرەمەر-ءمينيسترى – سىرتقى ىستەر ءمينيسترى شەيح مۇحاممەد بەن ابدۋلراحمان ءال تانيمەن كەلىسسوزدەر جۇرگىزدى.
كەزدەسۋ بارىسىندا تاراپتار قازاق-قاتار ستراتەگيالىق سەرىكتەستىگىنىڭ قازىرگى جاي-كۇيى مەن دامۋ پەرسپەكتيۆالارىن تالقىلاپ، ساياسي ديالوگتىڭ ودان ءارى نىعايتىلۋى، ساۋدا-ەكونوميكالىق جانە ينۆەستيتسيالىق ىنتىماقتاستىقتىڭ كەڭەيتىلۋى، سونداي-اق مادەني-گۋمانيتارلىق بايلانىستاردىڭ تەرەڭدەتىلۋىنە ەرەكشە نازار اۋداردى.
جوعارى جانە بيىك دەڭگەيلەردەگى بەلسەندى ساياسي ديالوگ ەكىجاقتى قاتىناستاردى ىلگەرىلەتۋ مەن قول جەتكىزىلگەن ۋاعدالاستىقتاردى دايەكتى ىسكە اسىرۋدا ماڭىزدى ءرول اتقاراتىنى اتالىپ ءوتتى.
ينۆەستيتسيالىق ىنتىماقتاستىق ماسەلەلەرىنە ەرەكشە كوڭىل ءبولىندى. تاراپتار ەنەرگەتيكا، تەلەكوممۋنيكاتسيالار، تسيفرلىق تەحنولوگيالار، اۋىل شارۋاشىلىعى، كولىك-لوگيستيكا جانە ءوزارا قىزىعۋشىلىق تۋدىراتىن وزگە دە باسىم سالالارداعى بىرلەسكەن جوبالاردىڭ ۋاقتىلى ءارى ساپالى ىسكە اسىرىلۋىنىڭ ماڭىزدىلىعىن اتاپ ءوتتى.
«قاتار قازاقستاننىڭ اراب الەمىندەگى جاقىن دا سەنىمدى ارىپتەسى بولىپ تابىلادى. ءبىز قالىپتاسقان ساياسي ديالوگ دەڭگەيىن، ءوزارا سەنىم احۋالىن جانە ەكىجاقتى قاتىناستاردىڭ ستراتەگيالىق سيپاتىن جوعارى باعالايمىز»، – دەپ اتاپ ءوتتى ە.كوشەرباەۆ.
ءوز كەزەگىندە، شەيح مۇحاممەد بەن ابدۋلراحمان ءال تاني قازاقستان مەن قاتار اراسىنداعى قاتىناستاردىڭ دامۋ قارقىنىن جوعارى باعالاپ، دوحانىڭ ستراتەگيالىق سەرىكتەستىكتى ودان ءارى نىعايتۋعا جانە ەكىجاقتى ىنتىماقتاستىقتىڭ نەگىزگى باعىتتارى بويىنشا بىرلەسكەن باستامالاردى ىلگەرىلەتۋگە دەگەن بەيىلدىلىگىن راستادى.
مادەني-گۋمانيتارلىق ىنتىماقتاستىققا دا ەرەكشە نازار اۋدارىلدى. اعىمداعى جىلدىڭ اقپان ايىندا قاتاردا وتكەن قازاقستاننىڭ مادەنيەتى كۇندەرى ەكى ەل حالىقتارى اراسىنداعى تۇسىنىستىكتى نىعايتۋعا جانە ولاردىڭ ءوزارا جاقىنداسۋىنا ماڭىزدى ۇلەس قوسقانى قاناعاتتانۋشىلىقپەن اتالىپ ءوتتى.
كەلىسسوزدەر بارىسىندا تاراپتار تۋريستىك اعىنداردىڭ وسكەنىن اتاپ ءوتىپ، قازاقستان مەن قاتار اراسىنداعى تىكەلەي اۋە قاتىناسىن ودان ءارى دامىتۋ ماڭىزدىلىعىنا توقتالدى.
حالىقارالىق جانە وڭىرلىك كۇن تارتىبىندەگى وزەكتى ماسەلەلەر بويىنشا، ەڭ الدىمەن تاياۋ شىعىستاعى اعىمداعى جاعداي كونتەكسىندە مازمۇندى پىكىر الماسۋ ءوتتى. ە.كوشەرباەۆ قازاقستاننىڭ بارلىق قاقتىعىستاردى حالىقارالىق قۇقىق قاعيداتتارى مەن بۇۇ جارعىسى نەگىزىندە تەك ساياسي-ديپلوماتيالىق جولمەن رەتتەۋ جونىندەگى ۇستانىمىنىڭ وزگەرمەيتىنىن اتاپ ءوتتى.
وسى تۇرعىدا مينيستر وڭىردە بەيبىتشىلىك پەن تۇراقتىلىقتى قالپىنا كەلتىرۋگە باعىتتالعان بەيبىت ديالوگتى ىلگەرىلەتۋ جونىندەگى كاتار باسشىلىعىنىڭ كۇش-جىگەرىن قازاقستان تاراپى قۇپتايتىنىن اتاپ ءوتتى. سونداي-اق قازاقستاننىڭ تۇركىستان قالاسىندا بەيبىت كەلىسسوزدەر وتكىزۋ ءۇشىن الاڭ ۇسىنۋعا دايىن ەكەنىنە نازار اۋداردى.
سۇحباتتاستار بۇۇ، يىۇ جانە اوسشك سياقتى حالىقارالىق جانە وڭىرلىك ۇيىمدار شەڭبەرىندەگى ءوزارا ءىس-قيمىلدى ودان ءارى ۇيلەستىرۋدىڭ ماڭىزدىلىعىن اتاپ ءوتىپ، جاھاندىق جانە وڭىرلىك كۇن ءتارتىبىنىڭ نەگىزگى ماسەلەلەرى بويىنشا ۇستانىمدارىنىڭ جاقىندىعىن راستادى.
كەزدەسۋ قورىتىندىسى بويىنشا تاراپتار قازاق-قاتار كوپقىرلى ىنتىماقتاستىعىن ودان ءارى نىعايتۋعا، بىرلەسكەن جوبالاردى ىسكە اسىرۋعا جانە ەكىجاقتى قاتىناستارعا جاڭا سەرپىن بەرۋگە دەگەن ءوزارا مۇددەلىلىكتى راستادى.
ايتا كەتسەك، ناۋرىز ايىندا قاسىم-جومارت توقاەۆ تۇركىستان وبلىسىنىڭ جۇرتشىلىعىمەن كەزدەسۋ بارىسىندا تاياۋ شىعىستاعى قاقتىعىسقا قاتىستى مالىمدەمە جاساپ، كەلىسسوزدەرگە شاقىرۋ جاساعان ەدى.
مەملەكەت باسشىسىنىڭ ايتۋىنشا، سوڭعى جىلدارى الەمدەگى گەوساياسي احۋال كۇردەلەنىپ، ءتۇرلى ايماقتاردا قارۋلى قاقتىعىستار مەن سوعىستار كوبەيگەن. بۇل جاعداي جاھاندىق ەكونوميكاعا كەرى اسەرىن تيگىزىپ وتىر.
"سوعىس ابدەن شيەلەنىسىپ كەتتى. مەنىڭشە، بۇل قاقتىعىستا ەشبىر مەملەكەت تۇپكىلىكتى پايداعا قول جەتكىزە المايدى", — دەدى مەملەكەت باسشىسى.
