بەلگىلى اقىن بەكجان ءاشىربايدى جەرلەۋ ءراسىمى دۇيسەنبىدەن جەكسەنبىگە اۋىستى، دەپ حابارلايدى "ادىرنا" ۇلتتىق پورتالى.
بۇل تۋرالى قازاقستان جازۋشىلار وداعى باسقارما توراعاسىنىڭ ورىنباسارى قاسىمحان بەگمانوۆ جەلىدەگى پاراقشاسىندا جازدى.
ونىڭ ايتۋىنشا، بەكجان ءاشىربايدىڭ تۋعان جەرىنە دەنەسىن دۇيسەنبىنى كۇتپەي الىپ كەتۋ تۋرالى شەشىم قابىلدانعان. بۇعان جولدىڭ ۇزاقتىعى مەن كۇننىڭ ىستىعى سەبەپ بولعان. قارالى جيىندى وتكىزۋ ماسەلەسى مارقۇمنىڭ اناسى ۇلبيكە جانە تۋعان-تۋىستارىمەن، قازاقستان جازۋشىلار وداعىنىڭ توراعاسىمەن كەلىسىلگەن. قارالى جيىن قازاقستان جازۋشىلار وداعى مەن بەكجان ءاشىرباي قىزمەت ەتكەن ءال-فارابي اتىنداعى قازاق ۇلتتىق ۋنيۆەرسيتەتىنىڭ ۇيىمداستىرۋىمەن ءوتۋى جوسپارلانعان ەدى.
الايدا تۋىستارى مارقۇمدى تۋعان جەرىنە ەرتەرەك جەتكىزۋ تۋرالى شەشىم قابىلداعان.
قاسىمحان بەگمانوۆ مارقۇم اقىنمەن بايلانىستى ەستەلىكتەرىمەن دە ءبولىستى. ول بەكجان ءاشىربايدىڭ شىعارماشىلىعىنا قاتىستى سوڭعى ماقالاسىن جازىپ، ونى «استانا اقشامى» گازەتىندە جاريالاعانىن اتاپ ءوتتى.
«بەكجان ءوزى جىرعا قوسقان سۇيىكتى الماتىسىنان ماڭگىگە، قايتىپ ورالمايتىن سوڭعى ساپارىنا كەتىپ بارا جاتىر دەگەننىڭ ءوزى ساناما سىيمايدى. قانشا قيماعانمەن، سۇم اجال ءوز دەگەنىن ىستەپ تىندى.
ءيا، اعايىن، جاڭا عانا بەكجاندى تۋعان جەرىنە شىعارىپ سالدىق»، – دەپ جازدى ول.
اقىننىڭ جانازاسى 16 تامىز كۇنى ساعات 11:00-دە تۇركىستان وبلىسى، ماقتاارال اۋدانى، مىرزاكەنت كەنتى، شاموۆ كوشەسى، 70-ۇيدە وتەدى.
مارقۇمدى سوڭعى ساپارعا شىعارىپ سالۋ ءراسىمى تۋرالى قازاقستان جازۋشىلار وداعىنىڭ تۇركىستان وبلىستىق جانە شىمكەنت قالالىق فيليالدارىنا، سونداي-اق تۇركىستان وبلىسى مەن ماقتاارال اۋدانىنىڭ اكىمدىكتەرىنە حابارلانعان.
«باقۇل بول، باۋىرىم بەكجان!» – دەپ جازدى قاسىمحان بەگمانوۆ.
