Qatar Memleketıne resmi sapary aiasynda Qazaqstan Respublikasynyŋ Syrtqy ıster ministrı Ermek Köşerbaev Qatar Memleketınıŋ Premer-Ministrı – Syrtqy ıster ministrı şeih Mūhammed ben Abdulrahman Äl Tanimen kelıssözder jürgızdı.
Kezdesu barysynda taraptar qazaq-qatar strategiialyq serıktestıgınıŋ qazırgı jai-küiı men damu perspektivalaryn talqylap, saiasi dialogtyŋ odan ärı nyǧaityluy, sauda-ekonomikalyq jäne investisiialyq yntymaqtastyqtyŋ keŋeitıluı, sondai-aq mädeni-gumanitarlyq bailanystardyŋ tereŋdetıluıne erekşe nazar audardy.
Joǧary jäne biık deŋgeilerdegı belsendı saiasi dialog ekıjaqty qatynastardy ılgerıletu men qol jetkızılgen uaǧdalastyqtardy däiektı ıske asyruda maŋyzdy röl atqaratyny atalyp öttı.
İnvestisiialyq yntymaqtastyq mäselelerıne erekşe köŋıl bölındı. Taraptar energetika, telekommunikasiialar, sifrlyq tehnologiialar, auyl şaruaşylyǧy, kölık-logistika jäne özara qyzyǧuşylyq tudyratyn özge de basym salalardaǧy bırlesken jobalardyŋ uaqtyly ärı sapaly ıske asyryluynyŋ maŋyzdylyǧyn atap öttı.
«Qatar Qazaqstannyŋ arab älemındegı jaqyn da senımdı ärıptesı bolyp tabylady. Bız qalyptasqan saiasi dialog deŋgeiın, özara senım ahualyn jäne ekıjaqty qatynastardyŋ strategiialyq sipatyn joǧary baǧalaimyz», – dep atap öttı E.Köşerbaev.
Öz kezegınde, şeih Mūhammed ben Abdulrahman Äl Tani Qazaqstan men Qatar arasyndaǧy qatynastardyŋ damu qarqynyn joǧary baǧalap, Dohanyŋ strategiialyq serıktestıktı odan ärı nyǧaituǧa jäne ekıjaqty yntymaqtastyqtyŋ negızgı baǧyttary boiynşa bırlesken bastamalardy ılgerıletuge degen beiıldılıgın rastady.
Mädeni-gumanitarlyq yntymaqtastyqqa da erekşe nazar audaryldy. Aǧymdaǧy jyldyŋ aqpan aiynda Qatarda ötken Qazaqstannyŋ mädenietı künderı ekı el halyqtary arasyndaǧy tüsınıstıktı nyǧaituǧa jäne olardyŋ özara jaqyndasuyna maŋyzdy üles qosqany qanaǧattanuşylyqpen atalyp öttı.
Kelıssözder barysynda taraptar turistık aǧyndardyŋ öskenın atap ötıp, Qazaqstan men Qatar arasyndaǧy tıkelei äue qatynasyn odan ärı damytu maŋyzdylyǧyna toqtaldy.
Halyqaralyq jäne öŋırlık kün tärtıbındegı özektı mäseleler boiynşa, eŋ aldymen Taiau Şyǧystaǧy aǧymdaǧy jaǧdai konteksınde mazmūndy pıkır almasu öttı. E.Köşerbaev Qazaqstannyŋ barlyq qaqtyǧystardy halyqaralyq qūqyq qaǧidattary men BŪŪ Jarǧysy negızınde tek saiasi-diplomatiialyq jolmen retteu jönındegı ūstanymynyŋ özgermeitının atap öttı.
Osy tūrǧyda Ministr öŋırde beibıtşılık pen tūraqtylyqty qalpyna keltıruge baǧyttalǧan beibıt dialogty ılgerıletu jönındegı Katar basşylyǧynyŋ küş-jıgerın Qazaqstan tarapy qūptaitynyn atap öttı. Sondai-aq Qazaqstannyŋ Türkıstan qalasynda beibıt kelıssözder ötkızu üşın alaŋ ūsynuǧa daiyn ekenıne nazar audardy.
Sūhbattastar BŪŪ, İYŪ jäne AÖSŞK siiaqty halyqaralyq jäne öŋırlık ūiymdar şeŋberındegı özara ıs-qimyldy odan ärı üilestırudıŋ maŋyzdylyǧyn atap ötıp, jahandyq jäne öŋırlık kün tärtıbınıŋ negızgı mäselelerı boiynşa ūstanymdarynyŋ jaqyndyǧyn rastady.
Kezdesu qorytyndysy boiynşa taraptar qazaq-qatar köpqyrly yntymaqtastyǧyn odan ärı nyǧaituǧa, bırlesken jobalardy ıske asyruǧa jäne ekıjaqty qatynastarǧa jaŋa serpın beruge degen özara müddelılıktı rastady.
Aita ketsek, nauryz aiynda Qasym-Jomart Toqaev Türkıstan oblysynyŋ jūrtşylyǧymen kezdesu barysynda Taiau Şyǧystaǧy qaqtyǧysqa qatysty mälımdeme jasap, kelıssözderge şaqyru jasaǧan edı.
Memleket basşysynyŋ aituynşa, soŋǧy jyldary älemdegı geosaiasi ahual kürdelenıp, türlı aimaqtarda qaruly qaqtyǧystar men soǧystar köbeigen. Būl jaǧdai jahandyq ekonomikaǧa kerı äserın tigızıp otyr.
"Soǧys äbden şielenısıp kettı. Menıŋşe, būl qaqtyǧysta eşbır memleket tüpkılıktı paidaǧa qol jetkıze almaidy", — dedı Memleket basşysy.
