تارازداعى «ۇلى دالا» شاعىن اۋدانىندا «تازا قازاقستان» رەسپۋبليكالىق اكتسياسى اياسىندا كەڭ كولەمدى كوگالداندىرۋ جۇمىستارى جۇرگىزىلدى.
تابيعاتتى قورعاۋ مەن قالانىڭ ەكولوگيالىق احۋالىن جاقسارتۋعا باعىتتالعان بۇل يگى شاراعا جەرگىلىكتى تۇرعىندار، ەرىكتىلەر مەن ءتۇرلى مەكەمە قىزمەتكەرلەرى بەلسەندى قاتىستى.
اكتسيا بارىسىندا شاعىن اۋدان اۋماعىنا بارلىعى 285 ءتۇپ اعاش وتىرعىزىلدى. ونىڭ ىشىندە 150 دانا ياسەن، 87 دانا كاتالپا، 28 دانا تەرەك جانە 20 دانا ايلانت كوشەتتەرى ەگىلدى.
ءاربىر اعاش ءتۇرى جەرگىلىكتى كليماتقا بەيىمدەلگەن، كولەڭكە بەرىپ، اۋانى تازارتۋعا ۇلەس قوساتىن جاسىل جەلەك رەتىندە تاڭدالعان.
«وسىنداي شارالار ارقىلى تۇرعىندار تابيعاتقا جاناشىرلىقپەن قاراۋدىڭ ءمانىن تەرەڭىرەك تۇسىنەدى، ال جاستاردىڭ بەلسەندى قاتىسۋى ەكولوگيالىق جاۋاپكەرشىلىكتى قالىپتاستىرۋعا ىقپال ەتەدى. ءاربىر ازامات ءوز اۋلاسىنان باستاپ، اينالاسىن تازا ۇستاۋعا داعدىلانسا، جالپى قالانىڭ ەكولوگيالىق كەلبەتى دە جاقسارادى. بۇل – بولاشاق ۇرپاققا قولايلى ورتا قالدىرۋ جولىنداعى ورتاق مىندەت» - دەپ اتاپ ءوتتى ۆولونتەر ە. بولىسبەك.
ايتا كەتۋ كەرەك، ەكولوگيالىق اكتسيا اياسىندا بۇگىنگى كۇنگە دەيىن 18 مىڭنان استام ادام مەن 850-دەن استام كاسىپورىن، مەكەمە قاتىسقان. ناتيجەسىندە 45,8 مىڭ جاسىل جەلەك وتىرعىزىلىپ، 1,8 مىڭ شاقىرىم كوشە جولدارى، 410 شاقىرىم ارىق جۇيەلەرى مەن كانالدار تازالانعان. سونىمەن قاتار، 72,4 مىڭ شارشى مەتر ساياباقتار مەن سكۆەرلەر اباتتاندىرىلىپ، 1,8 مىڭ توننا قوقىس شىعارىلعان.
ەكولوگيالىق مادەنيەتتى قالىپتاستىرۋ باعىتىندا دا وڭ ناتيجەلەر بار. تاراز جانە قاراتاۋ قالالارىندا جاسىل جەلەكتەردى تسيفرلاندىرۋ جۇمىستارى جۇرگىزىلىپ، ارنايى اقپاراتتىق پلاتفورما ىسكە قوسىلعان. بۇدان بولەك، تەلەگرام-بوت ارقىلى جىل باسىنان 290 ءوتىنىم قابىلدانىپ، ءتيىستى جۇمىستار جۇرگىزىلۋدە.
