تاريحشى، اۋدارماشى، جاس عالىم ومىربەك قاناي 1918 جىلى قولجازبا كۇيىندە اعىلشىن تىلىنە بەتپە-بەت اۋدارىلعان الاش ارداگەرلەرىنىڭ تاڭدامالى شىعارمالار جيناعىن تاپقانىن مالىمدەدى. ول بۇل تۋرالى الەۋمەتتىك جەلىدە جاريالادى، دەپ حابارلايدى "ادىرنا".
عالىمنىڭ ايتۋىنشا، بۇل – قازاق ادەبيەتىنىڭ ەۋروپاعا جەتكەن ەڭ العاشقى نۇسقالارىنىڭ ءبىرى.
اتالعان جيناققا احمەت بايتۇرسىنۇلى، حالەل دوسمۇحامەدوۆ، سپانديار كوبەەۆ جانە وزگە دە الاش زيالىلارىنىڭ شىعارمالارى ەنگىزىلگەن. قولجازبا سول كەزەڭدە اعىلشىن تىلىنە تىكەلەي اۋدارىلىپ، ەۋروپا وقىرمانىنا ۇسىنىلۋعا دايىندالعان.
ومىربەك قانايدىڭ سوزىنشە، سيرەك مۇرا وتكەن كۇزدە گەرمانياعا جاساعان ءىسساپارى بارىسىندا تابىلعان. عالىم قۇجاتتىڭ ەلەكتروندى كوشىرمەسىن جاساپ، ەلگە الىپ كەلگەن.
"وتكەن كۇزدە گەرمانياعا بارعان ءىسساپارىمدا ىزدەپ تاۋىپ، ەلەكتروندى كوشىرمەسىن ءوز قولىممەن جاساپ، الىپ كەلگەن ەدىم. الداعى ۋاقىتتا ەل يگىلىگىنە ۇسىنامىز", - دەدى تاريحشى.
قازىرگى ۋاقىتتا تاريحي ەڭبەكتى عىلىمي تۇرعىدا زەردەلەۋ جۇمىستارى جۇرگىزىلۋدە.
