ماڭعىستاۋ وبلىسىندا ازاماتتىق بەلسەندى مۇراتباي جۇماعاليەۆتىڭ قالتاسىنان ەسىرتكى تابىلىپ، ۇستالعانى تۋرالى اقپارات تارادى، دەپ حابارلايدى "ادىرنا" ۇلتتىق پورتالى "ازاتتىق راديوسىنا" سىلتەپ.
باسىلىم مالىمەتىنشە، الەۋمەتتىك جەلىلەردە تاراعان بەينەجازبالاردا بەلسەندىنى ارنايى ماقساتتاعى جاساق قىزمەتكەرلەرى قورشاپ تۇرعانى كورىنەدى. كادرلاردا جۇماعاليەۆ وزىنە قاتىستى ارانداتۋ جاسالىپ جاتقانىن ايتىپ، نارازىلىق بىلدىرگەن. بەلسەندىنىڭ ۇستالۋىنا دەيىن الەۋمەتتىك جەلىلەردە وعان قاتىستى داۋلى ۆيدەوماتەريالدار تاراعان. مامىر ايىنىڭ ورتاسىندا Telegram-ارنالار مەن پابليكتەردە مۇگەدەكتەر ارباسىنداعى ازاماتقا كۇش كورسەتىلگەن بەينە جاريالانىپ، كەيبىر قولدانۋشىلار كادرداعى ادامنىڭ مۇراتباي جۇماعاليەۆ بولۋى مۇمكىن ەكەنىن جازعان.
19 مامىردا بەلسەندى ۆيدەوۇندەۋ جاساپ، جاريالانعان ماتەريالدىڭ شىنايىلىعىنا كۇمان كەلتىردى. ونىڭ ايتۋىنشا، بەينەجازبا جاساندى ينتەللەكت كومەگىمەن وڭدەلگەن نەمەسە ەسكى ماتەريالداردىڭ نەگىزىندە قۇراستىرىلعان بولۋى مۇمكىن.
باق مالىمەتىنشە، مۇراتباي جۇماعاليەۆ پەن ۆيدەوداعى ەكىنشى ادام رەتىندە اتالعان ەرىك جۇماباەۆ قۇقىق قورعاۋ ورگاندارىنا جالعان اقپارات تاراتۋ جانە تۇرعىن ۇيگە زاڭسىز بەينەباقىلاۋ ورناتۋ دەرەكتەرى بويىنشا ارىز تۇسىرگەن. الايدا باسىلىمنىڭ جازۋىنشا، اتالعان وتىنىشتەر بويىنشا ناقتى شەشىم قابىلدانباعان.
مۇراتباي جۇماعاليەۆ – جاڭاوزەن قالاسىنداعى تانىمال ازاماتتىق بەلسەندىلەردىڭ ءبىرى. ول 2011 جىلعى مۇنايشىلار ەرەۋىلىنە قاتىسقان. كەيىن جاپپاي تارتىپسىزدىكتەر ءىسى بويىنشا ايىپتالىپ، شارتتى جازا العان. ءار جىلدارى بەلسەندى رۇقسات ەتىلمەگەن ميتينگىلەرگە قاتىسقانى ءۇشىن اكىمشىلىك جاۋاپكەرشىلىككە تارتىلعان. سونىمەن قاتار ول 2011 جىلعى جاڭاوزەن وقيعالارىن قايتا تەرگەۋدى تالاپ ەتىپ، قوعامدىق-ساياسي ماسەلەلەر بويىنشا پىكىر ءبىلدىرىپ كەلگەن.
قازىر مۇراتباي جۇماعاليەۆتىڭ قانداي ءىس بويىنشا ۇستالعانى جانە ونىڭ پروتسەسسۋالدىق مارتەبەسى تۋرالى رەسمي اقپارات جاريالانعان جوق. قۇقىق قورعاۋ ورگاندارى ازىرگە بۇل جاعدايعا قاتىستى تۇسىنىكتەمە بەرگەن جوق.
