2023 جىلعى 27 ساۋىردە حالىقارالىق ينجەنەرلىك-تەحنولوگيالىق ۋنيۆەرسيتەت قابىرعاسىندا قازاقستانداعى جەتەكشى عىلىمي-زەرتتەۋ ۇيىمى – اكادەميك ءو.ا. جولداسبەكوۆ اتىنداعى مەحانيكا جانە ماشيناتانۋ ينستيتۋتىمەن بىرلەسكەن «روبوتوتەحنيكا جانە باعدارلامالىق ينجەنەريا» عىلىمي-زەرتتەۋ جانە ءبىلىم بەرۋ ورتالىعىنىڭ اشىلۋى ءوتتى.
ورتالىق جۇمىسىنىڭ نەگىزگى باعىتى – روبوتوتەحنيكا جانە جاساندى ينتەللەكت سالاسىنداعى ءبىلىم بەرۋ، عىلىمي-تەحنيكالىق جانە يننوۆاتسيالىق قىزمەتتە بىرلەسكەن جوبالاردى جۇزەگە اسىرۋ جانە ۇزاق مەرزىمدى، ءوزارا ءتيىمدى ىنتىماقتاستىقتى دامىتۋ.
ءىس-شاراعا حالىقارالىق ينجەنەرلىك-تەحنولوگيالىق ۋنيۆەرسيتەتتىڭ رەكتورى، پروفەسسور گ.ا. سارسەنبەكوۆا، جەتەكشى عىلىمي-زەرتتەۋ ينستيتۋتتارىنىڭ، شەتەلدىك جوعارى وقۋ ورىندارىنىڭ بەلگىلى عالىمدارى: پروفەسسور، ستامبۋل تەحنيكالىق ۋنيۆەرسيتەتىنىڭ حالىقارالىق باعدارلامالارىنىڭ ۇيلەستىرۋشىسى ە.ي. ۆەليەۆ، پروفەسسور، ستامبۋل تەحنيكالىق ۋنيۆەرسيتەتىنىڭ مۆا تەحنيكالىق IT-ورتالىعىنىڭ ديرەكتورى م. حەلۆاچي، اكادەميك ءو.ا. جولداسبەكوۆ اتىنداعى مەحانيكا جانە ماشيناتانۋ ينستيتۋتىنىڭ باس ديرەكتورى ا.ق. تۋلەشوۆ، م. ادىشەۆ اتىنداعى وش تەحنولوگيالىق ۋنيۆەرسيتەتىنىڭ وقۋ-ءىسى جونىندەگى پرورەكتورى ۋ.ج. مامىتوۆ، ج.جيەمباەۆ اتىنداعى وسىمدىكتەردى قورعاۋ جانە كارانتين ينستيتۋتى قازعزي باسقارما توراعاسى ب.ءا. دۇيسەمبەكوۆ، التاي گەولوگيالىق-ەكولوگيالىق ينستيتۋتىنىڭ ديرەكتورى ش.ا. مۋزدىباەۆا، گەنەتيكا جانە فيزيولوگيا ينستيتۋتى باس ديرەكتورىنىڭ ورىنباسارى ە.ا. شادەنوۆا، ەكونوميكا ينستيتۋتى ديرەكتورىنىڭ عىلىم جونىندەگى ورىنباسارى گ.ج. الىبەكوۆا، زوولوگيا ينستيتۋتىنىڭ باس ديرەكتورى ر.ۆ. ياششەنكو، سونداي-اق جۇمىس بەرۋشىلەر، ۋنيۆەرسيتەتتىڭ عالىمدارى، پروفەسسورلىق-وقىتۋشىلىق قۇرامى جانە ءبىلىم الۋشىلارى قاتىستى.
عىلىمي-زەرتتەۋ جانە ءبىلىم بەرۋ ورتالىعىن رەسمي اشىلۋ سالتاناتىندا حالىقارالىق ينجەنەرلىك-تەحنولوگيالىق ۋنيۆەرسيتەتىنىڭ رەكتورى گ.ءا. سارسەنبەكوۆا جانە اكادەميك ءو.ا. جولداسبەكوۆ اتىنداعى مەحانيكا جانە ماشيناتانۋ ينستيتۋتىنىڭ باس ديرەكتورى ا.ق. تۋلەشوۆ، عىلىمي-زەرتتەۋ جانە تاجىريبەلىك-كونسترۋكتورلىق جۇمىستاردى جۇرگىزۋگە جانە عىلىمي جانە عىلىمي-تەحنيكالىق قىزمەت ناتيجەلەرىن كوممەرتسيالاندىرۋعا جاردەمدەسۋدى كوزدەيتىن بىرلەسكەن قىزمەت تۋرالى ۇزاق مەرزىمدى شارتقا قول قويدى. الداعى ۋاقىتتا ورتالىقتا ءبىلىم، عىلىم جانە ءوندىرىستى ينتەگراتسيالاۋ شەڭبەرىندە باكالاۆرلار، ماگيسترلەر، PhD دوكتورانتتار دايارلاۋ بويىنشا ناقتى ماقساتتار ايقىندالدى.
