پاكىستاننىڭ لاحور قالاسىندا وقۋ ورتالىعىنىڭ شاتىرى وپىرىلىپ قۇلاپ، كەمىندە 14 بالا قازا تاپتى، دەپ حابارلايدى «ادىرنا» ءتىلشىسى Dawn گازەتىنە سىلتەمە جاساپ.
وقيعا 30 ماۋسىم كۇنى بولعان. شاتىر قۇلاعان ساتتە سىنىپ ىشىندە ونداعان بالا بولعان. ولار ءۇيىندى استىندا قالىپ قويعان.
قۇتقارۋ قىزمەتىنىڭ رەسمي وكىلى فارۋك احمەدتىڭ سوزىنشە، قايعىلى جاعداي پەندجاب پروۆينتسياسىنداعى كاحنا اۋدانىندا تىركەلگەن.
«وقيعا سالدارىنان 14 بالا قازا تاپتى. تاعى 10 ادامنىڭ جاعدايى وتە اۋىر»، – دەدى ول.
ايتۋىنشا، قۇرباندار سانى ءالى دە ارتۋى مۇمكىن. Rescue 1122 قۇتقارۋ قىزمەتى ىزدەستىرۋ-قۇتقارۋ جۇمىستارىنىڭ جالعاسىپ جاتقانىن مالىمدەدى.
الدىن الا تەرگەۋ اياسىندا ەكى ادام، ونىڭ ىشىندە عيمارات يەسى ۇستالعان. لاحور پوليتسياسى باس ينسپەكتورىنىڭ ورىنباسارىنىڭ مالىمەتىنشە، ۇستالعانداردىڭ قاتارىندا بۇل عيماراتتى جۋىردا سالعان مەردىگەر دە بار. ونىڭ ايتۋىنشا، نىساننىڭ ءبىر بولىگى ءالى سالىنىپ جاتقان جانە اپات بولعان كەزدە قۇرىلىس جۇمىستارى جۇرگىزىلگەن.
پاكىستاننىڭ پرەمەر-ءمينيسترى شاحباز شاريف قازا تاپقان بالالاردىڭ جاقىندارىنا كوڭىل ايتتى. سونىمەن قاتار ول زارداپ شەككەندەردىڭ تەزىرەك ساۋىعىپ كەتۋىن تىلەپ، ولارعا بارلىق قاجەتتى مەديتسينالىق كومەك كورسەتۋدى تاپسىردى.
