“ادىرنا” ۇلتتىق پورتالى ۇجىمى 31 مامىر ساياسي قۋعىن-سۇرگىن قۇرباندارىن ەسكە الۋ كۇنىنە وراي، الماتىداعى رەپرەسسيا جانە اشتىق قۇرباندارىنا ارنالعان ەسكەرتكىشكە تاعزىم ەتتى.
شاراعا ۇجىمنان بولەك ءتۇرلى زيالى قاۋىم وكىلدەرى، قوعام بەلسەندىلەرى قاتىستى.
ۇجىم قىزمەتكەرلەرى 1930-جىلدارى ۇلت تاعدىرى ءۇشىن قۇربان بولعان الاش ارىستارىنىڭ سۋرەتىن الىپ، ولاردىڭ ەرلىگى مەن ەڭبەكتەرىن ايتىپ، ەسكە الدى. اشارشىلىق ۋاقىتىندا قازا تاپقان اتا-بابالارىمىزدىڭ رۋحىنا ءتاۋ ەتىپ، ەسكەرتكىشكە گۇل شوقتارىن قويدى.
بابالار رۋحىنا العىس ءبىلدىرىپ، قىرشىن كەتكەن ۇلت زيالىلارىن ەسكە الۋعا كەلگەن جۇرتشىلىق، قوعام ءۇشىن ماڭىزى زور داتانى ەلەۋسىز قالدىرماعان “ادىرنا” ۇجىمىنا العىستارىن جاۋدىردى.
“تاۋەلسىز ەلدىڭ ءتول پەرزەنتتەرى ءۇشىن بۇل كۇندە بابالار رۋحىن ەسكە الۋ، تاعزىم ەتۋ كيەلى پارىز. بۇگىنگى كۇنگى ازاتتىعىمىز وسى بابالارىمىزدىڭ قانىمەن كەلگەنى حاق. ەندەشە وسى تاۋەلسىزدىگىمىزدىڭ، ازات كۇنىمىزدىڭ قادىرى مەن قاسيەتىن ۇعا بىلەيىك. جاساسىن قازاق، جاساسىن الاش!” دەدى “ادىرنا” پورتالىنىڭ باسشىسى ارمان اۋباكىر.
"ادىرنا" ۇلتتىق پورتالى
