ءيزرايلدىڭ اسكەري قىزمەتكەرلەرى ەۋروپا، قىتاي جانە رەسەي ەلدەرىنىڭ ديپلوماتتارىنا ەسكەرتۋ وعىن اتقان، دەپ حابارلايدى “ادىرنا” ۇلتتىق پورتالى Bloomberg اگەنتتىگىنە سىلتەپ.
وقيعا يوردان وزەنىنىڭ باتىس جاعالاۋىنداعى دجەنين قالاسىنا ساپار بارىسىندا ورىن العان.
يزرايل ارمياسىنىڭ مالىمدەۋىنشە، دەلەگاتسيا بەكىتىلگەن قاۋىپسىز مارشرۋتتان اۋىتقىپ، قاقتىعىس ايماعىنا كىرىپ كەتكەن. سونىڭ سالدارىنان تساحال (يزرايل قورعانىس ارمياسى) ديپلوماتتارعا ەسكەرتۋ رەتىندە وق جاۋدىرعان. ابىروي بولعاندا، ەشكىم زارداپ شەككەن جوق.
ارميا بۇل جاعداي ءۇشىن كەشىرىم سۇراپ، ىشكى تەرگەۋ جۇرگىزىلەتىنىن جەتكىزدى. ال پالەستينالىق اكىمشىلىك بۇل ارەكەتتى «اككرەديتتەلگەن ديپلوماتيالىق دەلەگاتسياعا قاساقانا شابۋىل» دەپ باعالاپ وتىر.
بۇل وقيعا يزرايل مەن حاماس اراسىنداعى ۇزاققا سوزىلعان اسكەري قاقتىعىستاردىڭ شيەلەنىسكەن تۇسىندا بولدى. 18 مامىردا تساحال گازا سەكتورىنىڭ سولتۇستىگى مەن وڭتۇستىگىندە «گەدەون اربالارى» وپەراتسياسىن باستاعانىن حابارلاعان. بۇل حاماس قوزعالىسىنا قارسى ءىرى شابۋىلداردىڭ ءبىرى بولدى.
يزرايل پرەمەر-ءمينيسترى بينيامين نەتانياحۋ حاماس-تى تولىعىمەن جويۋ ماقساتىندا جاڭا اسكەري وپەراتسيالار جۇرگىزىلەتىنىن مالىمدەدى. ال بۇعان دەيىن، قاڭتار ايىندا قول قويىلعان ۋاقىتشا ءبىتىم 1 ناۋرىزدا بۇزىلىپ، ەكى تاراپ اراسىنداعى سوعىس ارەكەتتەرى قايتا جالعاسقان ەدى.
ۇقساس جاڭالىقتار
