ماڭعىستاۋ وبلىسى اكىمىنىڭ ءبىرىنشى ورىنباسارى اسحات ورالوۆ قازاقستان رەسپۋبليكاسىنداعى ءۇندىستان رەسپۋبليكاسىنىڭ توتەنشە جانە وكىلەتتى ەلشىسى سايلاس تانگالمەن كەزدەستى.
كەزدەسۋ بارىسىندا تاراپتار كولىك-لوگيستيكا، ونەركاسىپ، تۋريزم، تسيفرلىق تەحنولوگيالار جانە مادەني-گۋمانيتارلىق بايلانىستار سالالارىنداعى ەكىجاقتى ىنتىماقتاستىقتى كەڭەيتۋ پەرسپەكتيۆالارىن تالقىلادى.
اسحات ورالوۆ ءوڭىردىڭ الەۋەتىن تانىستىرىپ، ونىڭ ەلدەگى ماڭىزدى كولىك-لوگيستيكالىق جانە ينۆەستيتسيالىق توراپتاردىڭ ءبىرى رەتىندەگى ستراتەگيالىق ماڭىزىن اتاپ ءوتتى.
– ماڭعىستاۋ وبلىسى بۇگىندە كاسپي ماڭىنداعى ستراتەگيالىق دامۋ نۇكتەسى رەتىندە قالىپتاسىپ، قازاقستانداعى نەگىزگى لوگيستيكالىق جانە ينۆەستيتسيالىق حابتاردىڭ بىرىنە اينالۋدا. ءبىز ۇندىستانمەن جۇيەلى ءارى ۇزاق مەرزىمدى ارىپتەستىككە اشىقپىز جانە ونەركاسىپ، لوگيستيكا، تۋريزم، جوعارى تەحنولوگيالىق سالالار جانە باسقا دا باعىتتاردا بىرلەسكەن ينۆەستيتسيالىق جوبالاردى جۇزەگە اسىرۋ ءۇشىن بارىنشا قولايلى جاعداي جاساۋعا دايىنبىز. ماڭعىستاۋ وبلىسىنا ينۆەستيتسيا سالۋعا دەگەن دايىندىقتارىڭىز ەكىجاقتى ىنتىماقتاستىقتى نىعايتۋعا جانە بىرلەسكەن باستامالاردى تابىستى ىسكە اسىرۋعا كەڭ مۇمكىندىك بەرەدى، – دەپ اتاپ ءوتتى اسحات ورالوۆ.
كەزدەسۋدە تۋريزم سالاسىن دامىتۋعا دا ەرەكشە ءمان بەرىلدى. ءوڭىردىڭ بىرەگەي تابيعاتى، كيەلى نىساندارى جانە كاسپي تەڭىزىنە شىعۋ مۇمكىندىگى ونىڭ حالىقارالىق تۋريزم ورتالىعى رەتىندەگى الەۋەتىن ارتتىرا تۇسەدى.
ءۇندىستان ەلشىسى سايلاس تانگال ماڭعىستاۋ وبلىسىنىڭ ەكونوميكالىق جانە ينۆەستيتسيالىق الەۋەتىنە جوعارى باعا بەرىپ، ءۇندى تاراپىنىڭ ارىپتەستىكتى ودان ءارى نىعايتۋعا جانە بىرلەسكەن جوبالاردى جۇزەگە اسىرۋعا قىزىعۋشىلىق تانىتاتىنىن جەتكىزدى.
جالپى ماڭعىستاۋ وبلىسى مەن ءۇندىستان اراسىنداعى ءوزارا ءىس-قيمىل وڭ سەرپىن الىپ، ساۋدا-ەكونوميكالىق بايلانىستار تۇراقتى دامىپ كەلەدى.
2025 جىلدىڭ قورىتىندىسى بويىنشا ماڭعىستاۋ وبلىسى مەن ءۇندىستان اراسىنداعى سىرتقى ساۋدا اينالىمىنىڭ كولەمى 4,7 ملن اقش دوللارىن قۇرادى. قازىرگى ۋاقىتتا وڭىردە ءۇندى كاپيتالىنىڭ قاتىسۋىمەن 19 كاسىپورىن جۇمىس ىستەيدى.
