ءۇندىستاننىڭ اندحرا-پرادەش شتاتىندا COVID-تەن قورىققان وتباسى 15 اي بويى ۇيدەن شىقپاي وتىرعان. پوليتسيا ولاردى ءماجبۇرلى تۇردە اۋرۋحاناعا جەتكىزدى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
كادالي اۋىلىنىڭ باسشىسى چوپپالا گۋرۋناتحتىڭ ايتۋىنشا، كوروناۆيرۋستان تىعىلعان وتباسى شاتىرلى ۇيدە تۇرادى. وتاعاسى – چۋتتۋگاللى بەنني. ايەلى جانە ەكى ۇلكەن قىزى بار. تورتەۋى كوروناۆيرۋستى جۇقتىرۋدان قورقىپ، بىلتىردان بەرى ادامدارمەن ارالاسپاي قويعان.
«ولار كوروناۆيرۋستان قاتتى قورىققان. سودان ءۇيدى ىشىنەن بەكىتىپ الىپ، 15 اي بويى دالاعا شىقپاي قويىپتى»، - دەيدى گۋرۋناتح.
ول ۇيگە جاس ۆولونتەر بارماعاندا جەرگىلىكتى بيلىك «قاماۋدا» وتىرعان وتباسى جايىندا بىلمەيتىن ەدى. ەرىكتى ولارعا جەر تەلىمىنىڭ بەرىلگەنىن ايتۋعا بارعان. ال ەسىكتى قاققاندا ءۇي يەلەرى اشپاي قويىپتى. ايەل جانە ونىڭ 30 جاستاعى قىزدارى كوروناۆيرۋستان قورقاتىنىن، ال دالاعا شىقسا، ءولىپ قالاتىنىن ايتقان. ءسويتىپ ەرىكتىنى ۇيگە كىرگىزبەيدى. ارتىنان وتباسىنىڭ تۋىستارى دا جەرگىلىكتى بيلىككە حابارلاسىپ، ۇيدە تىعىلىپ وتىرعان وتباسىنىڭ جاعدايى ناشارلاپ كەتكەنىن جەتكىزگەن.
«ۆولونتەر بىزگە جاعدايدىڭ ءمان-جايىن جەتكىزگەننەن كەيىن ءبارىمىز سول جەرگە باردىق. ولار كىشكەنتاي شاتىردا تۇرادى. ءتىپتى سول جەردە دارەت سىندىرعان. ءبىز جەرگىلىكتى تۇرعىندار مەن پوليتسيانىڭ كومەگىمەن ولاردى اۋرۋحاناعا جاتقىزدىق. قازىرگى كەزدە بارلىعى ەمدەۋ كۋرسىنان ءوتىپ جاتىر»، - دەپ اتاپ ءوتتى گۋرۋناتح.
ونىڭ ايتۋىنشا، ايەلدەردىڭ جاعدايى قيىنداپ كەتكەن. ولار كوپتەن بەرى جۋىنباعان، شاشىن دا قيدىرماپتى. جەرگىلىكتى بيلىك ەكى-ءۇش كۇنگە كەشىككەندە ايەلدەر ءولىپ كەتۋى مۇمكىن ەدى.
"ادىرنا" ۇلتتىق پورتالى
