بۇگىندە پاتريوتيزم ۇعىمى جاڭا مازمۇنمەن تولىعىپ كەلەدى. ول تەك ۇران مەن ءسوز جۇزىندەگى سەزىم ەمەس، ناقتى ارەكەتپەن ولشەنەتىن قۇندىلىققا اينالدى. قازاقستاندىق جاستار ءۇشىن وتانعا دەگەن سۇيىسپەنشىلىك – ەلدىڭ دامۋىنا ۇلەس قوسۋ، قوعامعا پايدالى بولۋ جانە مەملەكەتتىك رامىزدەردى قۇرمەتتەۋدەن باستالادى. وسى ورايدا ءبىز ءار سالاداعى جاستارمەن تىلدەسىپ، ولاردىڭ ۇلتجاندىلىق تۋرالى پىكىرىن بىلگەن ەدىك.
پاتريوتيزم تۋرالى جاڭا زاڭدا نە ايتىلادى؟
سوڭعى جىلدارى قازاقستاندا پاتريوتتىق تاربيەنى كۇشەيتۋگە باعىتتالعان باستامالار جۇيەلى تۇردە قولعا الىنىپ كەلەدى. جاڭا زاڭنامالىق وزگەرىستەردە پاتريوتيزم تەك يدەولوگيالىق ۇعىم رەتىندە ەمەس، ازاماتتىق جاۋاپكەرشىلىكپەن تىكەلەي بايلانىستىرىلعان.
قۇجاتتاردا مەملەكەتتىك رامىزدەرگە قۇرمەتپەن قاراۋ، قوعامدىق ءتارتىپتى ساقتاۋ، ەلدىڭ دامۋىنا بەلسەندى اتسالىسۋ – ءاربىر ازاماتتىڭ مىندەتى رەتىندە ايقىن كورسەتىلگەن. سونىمەن قاتار، جاستار اراسىندا ۇلتتىق قۇندىلىقتاردى دارىپتەۋ، تاريحي سانانى قالىپتاستىرۋ جانە بىرلىك پەن تۇراقتىلىقتى نىعايتۋ باستى باعىتتاردىڭ ءبىرى رەتىندە بەلگىلەنگەن.
ياعني، قازىرگى تۇسىنىكتە پاتريوتيزم – تەك سەزىم ەمەس، ناقتى ءىس پەن جاۋاپكەرشىلىك.
ستۋدەنت اسان اسلان: “پاتريوتيزم – كۇندەلىكتى تاڭداۋدان باستالادى”
الماتى قالاسىنداعى جوعارى وقۋ ورىندارىنىڭ بىرىندە ءبىلىم الىپ جۇرگەن ستۋدەنت اسان اسلان ۇلتجاندىلىقتى قاراپايىم ارەكەتتەردەن كورەدى.
– مەن ءۇشىن پاتريوتيزم – ۇلكەن سوزدەر ايتۋ ەمەس. بۇل – ءوز قالاڭدى تازا ۇستاۋ، زاڭدى ساقتاۋ، ءوز ءىسىڭدى ادال جاساۋ. كەيدە ادامدار ءپاتريوتيزمدى تەك مەرەكەلەرمەن بايلانىستىرادى. بىراق ول كۇن سايىن كورىنۋى كەرەك. مىسالى، قوقىستى جەرگە تاستاماۋ دا – ەلگە دەگەن قۇرمەت، – دەيدى ول.
ونىڭ ايتۋىنشا، جاستار اراسىندا بۇل تۇسىنىك بىرتىندەپ وزگەرىپ كەلەدى. كوپشىلىك ءۇشىن پاتريوتيزم ەندى ناقتى ارەكەتپەن بايلانىسا باستادى.
مەملەكەتتىك قىزمەتكەر ارايلىم مىرزاعاليەۆا: “رامىزدەرگە قۇرمەت – ەلگە قۇرمەت”
مەملەكەتتىك قىزمەت سالاسىندا ەڭبەك ەتىپ جۇرگەن ارايلىم مىرزاعاليەۆا ءپاتريوتيزمنىڭ ماڭىزدى بولىگى رەتىندە مەملەكەتتىك رامىزدەرگە دەگەن قۇرمەتتى اتاپ ءوتتى.
– مەملەكەتتىك تۋ، ەلتاڭبا، ءانۇران – بۇل جاي عانا بەلگىلەر ەمەس، بۇل – ءبىزدىڭ تاريحىمىز بەن بولمىسىمىز. ولارعا قۇرمەت كورسەتۋ – ءوزىڭنىڭ قاي ەلدىڭ ازاماتى ەكەنىڭدى سەزىنۋ. قىزمەت بارىسىندا دا، كۇندەلىكتى ومىردە دە وسى قۇندىلىقتاردى ساقتاۋعا تىرىسامىن، – دەيدى ول.
ونىڭ پىكىرىنشە، پاتريوتيزم – تەك سەزىم ەمەس، ول ءتارتىپ، جاۋاپكەرشىلىك جانە ىشكى مادەنيەت.
كاسىپكەر ارۋجان ۋستەميروۆا: “ەلگە پايدا كەلتىرۋ – ناعىز پاتريوتيزم”
جاس كاسىپكەر ارۋجان ۋستەميروۆا ءپاتريوتيزمدى ەل ەكونوميكاسىنا ۇلەس قوسۋمەن بايلانىستىرادى.
– مەن ءۇشىن وتاندى ءسۇيۋ – ءوز ءىسىڭ ارقىلى قوعامعا پايدا كەلتىرۋ. جۇمىس ورىندارىن اشۋ، ساپالى ءونىم ۇسىنۋ، ادال ەڭبەك ەتۋ – وسىنىڭ ءبارى ءپاتريوتيزمنىڭ كورىنىسى. ءار ادام ءوز سالاسىندا جاقسى جۇمىس ىستەسە، ەل دە داميدى، – دەيدى ول.
ارۋجاننىڭ ايتۋىنشا، قازىرگى جاستار ءپاتريوتيزمدى بۇرىنعىدان وزگەشە قابىلدايدى: ولار ءۇشىن باستىسى – ناقتى ناتيجە مەن پايدالى ءىس.
