تاۋەلسىزدىك كۇنى قارساڭىندا ءارتۇرلى شارالار وتەدى. بالالاردى پاتريوتتىقتا باۋلۋ ءۇشىن بۇل - كەرەك نارسە. بىراق سونداعى ايتىلاتىن اڭگىمەلەردىڭ كەيبىرىن جاڭارتۋ كەرەك دەپ ويلايمىن.
1) الەم.
الەم تانىعان قازاقستان، ابايدى الەم تانىعان، شوقان الەمدىك جاڭالىق اشقان دەگەن سەكىلدى، نە ايتسا دا الەمدى قوسىپ ايتۋ. بۇل - نۇرسۇلتان نازارباەۆ كەزىندە قالىپتاسقان ادەت. الەەەەم، الەم دەپ وتىرۋشى ەدىك قوي. الەمدىك ءدىن ليدەرلەرىنىڭ سەزى، ەكسپو، الەم تانىعان استانا دەگەندەي. وسىنى قويۋ كەرەك. نە بولسا دا قازاققا قانشالىق پايدالى بولدى، سو جاعىنان كەلۋ كەرەك. اقش حالقىنىڭ 70%-ىنا الەمدە نە بولىپ جاتقانى قىزىق ەمەس دەسەدى. ويتكەنى ولارعا وزدەرى قىزىق. ولار جەردىڭ كىندىگى. ال بىزگە وزىمىزدىكىنەن باسقانىڭ ءبارى قىزىق. وزىمىزدىكى الەمگە قىزىق بولسا عانا وزىمىزگە قىزىق.
2) مەندەلەەۆ كەستەسى.
ءبىزدىڭ جەرىمىز باي، جەرىمىزدىڭ استىندا مەندەلەەۆ كەستەسىندەگى بارلىق ەلەمەنت بار دەگەن اڭگىمە. بار بولسا نە بولىپتى؟ ول ليۆيادا دا بار، ازداپ بولسا دا كەشەگى قىرىلىپ جاتقان سيريادا دا بار. ۆەنەسۋەلللادا دا بار. بار بولعانىنان بىزگە نە پايدا؟ ول جەردە ءبىزدىڭ قانداي ەڭبەگىمىز بار؟
ءبىز جەردىڭ ۇستىندە ءومىر ءسۇرىپ جاتقان ادامداردىڭ جەتىستىگى تۋرالى ايتۋىمىز كەرەك. عىلىمي جاڭالىق اشقاندار، كاسىپ ۇستاپ وتىرعاندار، شىنايى ونەر جاساپ وتىرعاندار. وسىلاردى ايتىپ ماقتانۋىمىز كەرەك.
3) 100-دەن استام ۇلتتار مەن ۇلىستار.
قازاقستان كوپ ۇلتتى ەل، 100-دەن استام ۇلت ءومىر سۇرەدى دەگەندى قويۋ كەرەك. ودان دا بۇرىنعى ءانۇراندا ايتقانداي، “باۋىرعا باسقانبىز بارشانىڭ بالاسىن” دەۋىمىز كەرەك. ءبىز بارمىز، سوسىن ءبىزدىڭ قاناتىمىزدىڭ استىندا ءومىر ءسۇرىپ جاتقان ازىن-اۋلاق ۇلت بار.
4) ەلباسىنىڭ ارقاسى.
ءسوز جوق، نۇرسۇلتان نازارباەۆتىڭ ەڭبەگى بار، بىراق سول قيىن كەزدە ول كىسىمەن بىرگە جۇمىس ىستەگەن قانشاما ادام بار، سول كەزدەگى قيىندىققا شىداعان حالىق بار. سونى دا ايتۋىمىز كەرەك. ەگەر جاقسىلىقتىڭ ءبارى نازارباەۆتىڭ ارقاسى دەسەك، وندا قاتەلىكتىڭ دە ءبارى سول كىسىنىڭ كەسىرى بولىپ قالادى.
5) عاسىرلار بويى اتا-بابامىز اڭساعان تاۋەلسىزدىك.
ءبىز كەنەسارى ءشاھيت بولعاننان كەيىن عانا ءبىرجولا بودان بولدىق. سوندا اينالاسى ءبىر-جارىم عاسىر ورىسقا تاۋەلدى بولدىق دەگەن ءسوز. 1991 جىلى تاۋەلسىزدىگىمىزدى قالپىنا كەلتىردىك. وسىلاي ايتقانىمىز ابزال.
بالالارعا قانشا قيىندىق كورسەك تە امان شىققان، مىقتى حالىقپىز دەگەن يدەيانى ءسىڭىرۋىمىز كەرەك.
“تالايدى وتكەردىك، وتكەنگە سالاۋات،
كەلەشەك عاجايىپ، كەلەشەك عالامات،
تاعدىردىڭ تەزىنەن، توزاقتىڭ وزىنەن امان-ساۋ قالىپپىز، امان-ساۋ قالىپپىز”.
“مەنىڭ ەلىم، مەنىڭ جەرىم،
گۇلىڭ بولىپ ەگىلەمىن،
جىرىڭ بولىپ توگىلەمىن، ەلىم،
تۋعان جەرىم مەنىڭ - قازاقستانىم!”
ارمان المەنبەت
