كاسپي تەڭىزىندەگى وقۋ-جاتتىعۋ جيىنى كەزىندە امان قالعان ءۇش سارباز "ەرلىگى ءۇشىن" مەدالىمەن ماراپاتتالدى. بۇل تۋرالى "اقوردا جازدى، دەپ حابارلايدى "ادىرنا".
مەملەكەت باسشىسىنىڭ جارلىعىمەن اسكەري بورىشىن اتقارۋ ۇستىندە كورسەتكەن ەرلىگى مەن جانقيارلىعى ءۇشىن ءبىر توپ اسكەري قىزمەتشى "ەرلىگى ءۇشىن" مەدالىمەن ماراپاتتالدى:
- قۋاندىق بەكەت باقتىبەكۇلى – 29011 اسكەري ءبولىمىنىڭ ماتروسى (اتقىشى);
- تەمىرحان اقجول تيمۋرۇلى – 29011 اسكەري ءبولىمىنىڭ ماتروسى (اتقىشى);
- ۋدالوۆ نيكيتا الەكساندروۆيچ – 29011 اسكەري ءبولىمىنىڭ مامانى (سانيتاريالىق نۇسقاۋشىسى).
ايتا كەتەيىك، بۇعان دەيىن اسكەري بورىشىن اتقارۋ ۇستىندە كورسەتكەن ەرلىگى مەن جانقيارلىعى ءۇشىن ماڭعىستاۋ وبلىسىنداعى وقۋ-جاتتىعۋ جيىنى كەزىندە قازا تاپقان اسكەري قىزمەتشىلەر قازاقستان رەسپۋبليكاسىنىڭ مەملەكەتتىك ناگرادالارىمەن ماراپاتتالعان بولاتىن.
ەسكە سالايىق، 24 قىركۇيەكتە ماڭعىستاۋ وبلىسىندا قازاقستان قارۋلى كۇشتەرى اسكەري-تەڭىز كۇشتەرىنىڭ وقۋ-جاتتىعۋى كەزىندە 17 اسكەري قىزمەتشىنى تەڭىز اعىزىپ اكەتكەن. ولار كاسپي جاعالاۋىندا وقۋ-جاۋىنگەرلىك تاپسىرما ورىنداپ جاتقاندا اۋا رايى كۇرت ناشارلاپ، جەل كۇشەيگەن.
قورعانىس مينيسترلىگىنىڭ مالىمەتىنشە، 14 اسكەري قىزمەتشى قازا تاپقان، ۇشەۋى قۇتقارىلدى.
قايعىلى وقيعادان كەيىن 25 قىركۇيەك قازاقستاندا جالپىۇلتتىق ازا تۇتۋ كۇنى بولىپ جاريالانعان بولاتىن.
