رەسەي ءيزرايلدىڭ كاسپي تەڭىزىندەگى لوگيستيكا مەن ساۋداعا ءتوندىرىپ وتىرعان قاۋىپتەرىن قابىلداۋعا كەلمەيتىن ارەكەت دەپ سانايدى. بۇل تۋرالى رف ءسىم رەسمي وكىلى ماريا زاحاروۆا بريفينگ بارىسىندا مالىمدەدى، دەپ حابارلايدى «ادىرنا» ءتىلشىسى ريا نوۆوستيگە سىلتەمە جاساپ.
«يزرايل تاراپىنان سۋ ايدىندارىنا، سونىڭ ىشىندە ساۋدا مەن تاۋارلاردى تاسىمالداۋعا توندىرىلەتىن قاۋىپتەر – ءبىز ءۇشىن قابىلداۋعا كەلمەيتىن ارەكەت. ول جاعالاۋداعى بارلىق مەملەكەتتىڭ تاراپىنان ەڭ قاتال ايىپتاۋدى قاجەت ەتەدى»، — دەدى ديپلومات.
20 ناۋرىزدا ماريا زاحاروۆا اقش پەن ءيزرايلدىڭ يرانعا قارسى اسكەري وپەراتسياسى اياسىندا بەندەر-ەنزەلي پورتىنا جاسالعان شابۋىل رەسەي مەن كاسپي جاعالاۋى مەملەكەتتەرىنىڭ ەكونوميكالىق مۇددەلەرىنە زاقىم كەلتىرگەنىن ايتقان ەدى. رەسەي ءسىم وكىلىنىڭ سوزىنشە، كاسپي پورتى ماڭىزدى ساۋدا-لوگيستيكالىق حاب رەتىندە قىزمەت ەتەدى جانە ول رەسەي-يران ساۋداسىن، سونىڭ ىشىندە ازىق-تۇلىك تاسىمالىن قامتاماسىز ەتۋ ءۇشىن بەلسەندى تۇردە قولدانىلادى.
