اقش پرەزيدەنتى دونالد ترامپ يراننىڭ ەنەرگەتيكالىق نىساندارىنا سوققى جاساۋدى تاعى 10 كۇنگە شەگەرۋ تۋرالى شەشىم قابىلداعانىن مالىمدەدى. ونىڭ ايتۋىنشا، بۇل شەشىم يران ۇكىمەتىنىڭ ءوتىنىشى بويىنشا قابىلدانعان. الايدا تەگەران مۇنداي ءوتىنىش جاساعانىن جوققا شىعارىپ وتىر.
«يران ۇكىمەتىنىڭ ءوتىنىشى بويىنشا ەلەكتر ستانتسيالارىنا سوققى جاساۋدى 10 كۇنگە، ياعني 2026 جىلعى 6 ءساۋىر، دۇيسەنبى كۇنى شىعىس ۋاقىتىمەن 20:00-گە دەيىن توقتاتا تۇرامىن. كەلىسسوزدەر جالعاسىپ جاتىر»، - دەپ جازدى ول Truth Social الەۋمەتتىك جەلىسىندە.
وتكەن دەمالىس كۇندەرى ترامپ ەگەر تەگەران 48 ساعات ىشىندە ورمۋز بۇعازىن اشپاسا، يراندىق ەلەكتر ستانتسيالارىن «جويىپ جىبەرەمىن» دەپ قوقان-لوقى جاساعان بولاتىن. بۇعان جاۋاپ رەتىندە يران بيلىگى بۇعازدى كەمە قاتىناسى ءۇشىن تولىق جاباتىنىن مالىمدەدى.
دۇيسەنبى كۇنى ترامپ اقش پەن يران سوعىستى اياقتاۋ جونىندە ء«ونىمدى كەلىسسوزدەر» جۇرگىزىپ جاتقانىن ايتىپ، يران ەنەرگەتيكاسىنا سوققىلاردى بەس كۇنگە توقتاتۋعا بۇيرىق بەرگەنىن جەتكىزدى.
سارسەنبى كۇنى اقش يرانعا قاقتىعىستى توقتاتۋ ءۇشىن ۇسىنىلعان 15 شارتتان تۇراتىن ءتىزىمدى جولداعانى بەلگىلى بولدى. الايدا تەگەران بۇل شارتتاردى قابىلداماي، ونىڭ ورنىنا بەس تارماقتان تۇراتىن ءوز جوسپارىن ۇسىنعان.
قازىرگى ۋاقىتتا اقش-تىڭ يراندا ناقتى كىممەن كەلىسسوز جۇرگىزىپ جاتقانى بەلگىسىز. بۇعان دەيىن ترامپ يراندىق رەسمي تۇلعالار كەلىسسوزدەر ءجۇرىپ جاتقانىن ءوز وتانداستارى تاراپىنان ءولتىرىلۋ قاۋپىنەن قورقىپ، جوققا شىعارىپ وتىرعانىن ايتقان.
«ولار كەلىسسوز جۇرگىزىپ جاتىر جانە كەلىسىمگە كەلگىسى كەلەدى. بىراق بۇل تۋرالى ايتۋعا قورقادى، ويتكەنى ءوز ەلىندە ولاردى ولتىرەدى دەپ ويلايدى. سونىمەن قاتار، ءبىز ءولتىرۋىمىز مۇمكىن دەپ تە قورقادى»، - دەدى ول جۋرناليستەرگە.
ترامپ سوققىلاردىڭ كەيىنگە شەگەرىلگەنىن جاريالاعاننان كەيىن كوپ ۇزاماي الەمدىك نارىقتا مۇناي باعاسى تومەندەي باستادى. الايدا بەيسەنبى كۇنى باعا قايتا وسە ءتۇستى. بۇل سوعىستىڭ جالعاسۋى مۇناي تاپشىلىعىن ۋشىقتىرۋى مۇمكىن دەگەن الاڭداۋشىلىقتى كورسەتتى.
