AQŞ prezidentı Donald Tramp İrannyŋ energetikalyq nysandaryna soqqy jasaudy taǧy 10 künge şegeru turaly şeşım qabyldaǧanyn mälımdedı. Onyŋ aituynşa, būl şeşım İran ükımetınıŋ ötınışı boiynşa qabyldanǧan. Alaida Tegeran mūndai ötınış jasaǧanyn joqqa şyǧaryp otyr.
«İran ükımetınıŋ ötınışı boiynşa elektr stansiialaryna soqqy jasaudy 10 künge, iaǧni 2026 jylǧy 6 säuır, düisenbı künı şyǧys uaqytymen 20:00-ge deiın toqtata tūramyn. Kelıssözder jalǧasyp jatyr», - dep jazdy ol Truth Social äleumettık jelısınde.
Ötken demalys künderı Tramp eger Tegeran 48 saǧat ışınde Ormuz būǧazyn aşpasa, irandyq elektr stansiialaryn «joiyp jıberemın» dep qoqan-loqy jasaǧan bolatyn. Būǧan jauap retınde İran bilıgı būǧazdy keme qatynasy üşın tolyq jabatynyn mälımdedı.
Düisenbı künı Tramp AQŞ pen İran soǧysty aiaqtau jönınde «önımdı kelıssözder» jürgızıp jatqanyn aityp, İran energetikasyna soqqylardy bes künge toqtatuǧa būiryq bergenın jetkızdı.
Särsenbı künı AQŞ İranǧa qaqtyǧysty toqtatu üşın ūsynylǧan 15 şarttan tūratyn tızımdı joldaǧany belgılı boldy. Alaida Tegeran būl şarttardy qabyldamai, onyŋ ornyna bes tarmaqtan tūratyn öz josparyn ūsynǧan.
Qazırgı uaqytta AQŞ-tyŋ İranda naqty kımmen kelıssöz jürgızıp jatqany belgısız. Būǧan deiın Tramp irandyq resmi tūlǧalar kelıssözder jürıp jatqanyn öz otandastary tarapynan öltırılu qaupınen qorqyp, joqqa şyǧaryp otyrǧanyn aitqan.
«Olar kelıssöz jürgızıp jatyr jäne kelısımge kelgısı keledı. Bıraq būl turaly aituǧa qorqady, öitkenı öz elınde olardy öltıredı dep oilaidy. Sonymen qatar, bız öltıruımız mümkın dep te qorqady», - dedı ol jurnalisterge.
Tramp soqqylardyŋ keiınge şegerılgenın jariialaǧannan keiın köp ūzamai älemdık naryqta mūnai baǧasy tömendei bastady. Alaida beisenbı künı baǧa qaita öse tüstı. Būl soǧystyŋ jalǧasuy mūnai tapşylyǧyn uşyqtyruy mümkın degen alaŋdauşylyqty körsettı.
