20 ماۋسىمدا قر سىرتقى ىستەر مينيسترلىگى يران مەن يزرايلدەن قازاقستاندىقتاردى ەۆاكۋاتسيالاۋدى جالعاستىرىپ جاتقانى تۋرالى مالىمدەدى، دەپ حابارلايدى "ادىرنا" ۇلتتىق پورتالى.
اقپاراتقا سايكەس، ەۆاكۋاتسيالىق ءىس-شارالار اياسىندا يزرايلدەن – 66 وتانداسىمىز (ەگيپەت ارقىلى), يراننان – 78 ازامات (ارمەنيا ارقىلى – 73, ازەربايجان ارقىلى – 2, تۇرىكمەنستان ارقىلى – 3) ەلگە جەتكىزىلگەن.
«يران مەن يزرايلدەگى قازاقستاندىق ديپلوماتتار ءوز ازاماتتارىنا قاجەتتى كونسۋلدىق جانە قۇقىقتىق كومەك كورسەتۋ جۇمىسىن جالعاستىرۋدا. قر ءسىم يزرايل، ەگيپەت جانە ارمەنيا بيلىگىنە العىس بىلدىرەدى. سونداي-اق، يراندىق، ازەربايجاندىق جانە تۇرىكمەن ارىپتەستەرگە دە قازاقستان ازاماتتارىن ەۆاكۋاتسيالاۋعا قولداۋ كورسەتكەنى ءۇشىن ريزاشىلىعىن بىلدىرەدى. بىرلەسكەن كۇش-جىگەردىڭ ارقاسىندا كوبىرەك ازاماتتار ۇيلەرىنە امان-ەسەن ورالۋعا مۇمكىندىك الىپ جاتىر»، – دەلىنگەن مينيسترلىكتىڭ ءباسپاسوز قىزمەتى تاراتقان حابارلامادا.
بۇعان دەيىن، 2025 جىلعى 18 ماۋسىمدا، قر سىرتقى ىستەر مينيسترلىگى يراننان 109 قازاقستاندىقتىڭ ەۆاكۋاتسيالانعانىن حابارلاعان ەدى. ولار ەلگە تۇرىكمەنستان مەن ازەربايجان ارقىلى جەتكىزىلگەن بولاتىن.
