يراندا ورىندالۋى ءتيىس بولعان 800 ءولىم جازاسى ۋاقىتشا توقتاتىلدى. بۇل تۋرالى اق ءۇيدىڭ ءباسپاسوز حاتشىسى كەرولاين ليۆيتت بۇل تۋرالى 15 قاڭتار كۇنى جۋرناليستەرگە مالىمدەدى، دەپ حابارلايدى "ادىرنا".
ءليۆيتتتىڭ ايتۋىنشا، پرەزيدەنت يراندا 14 قاڭتاردا ورىندالۋى ءتيىس بولعان 800 ءولىم جازاسى توقتاتىلدى دەگەن اقپاراتقا سۇيەنىپ وتىر. الايدا اق ءۇي وكىلى بۇل مالىمەتتىڭ قاي دەرەككوزدەن الىنعانىن ناقتىلامادى.
بۇعان دەيىن دونالد ترامپ «وتە ماڭىزدى دەرەككوزدەر» وعان يرانداعى ءولىم جازالارى توقتايتىنىن حابارلاعانىن ايتقان. سونىمەن قاتار اق ءۇي پرەزيدەنتتىڭ جاعدايدى باقىلاپ وتىرعانىن جانە ارەكەت ەتۋدىڭ بارلىق نۇسقاسى قاراستىرىلىپ جاتقانىن جەتكىزدى.
Al Hadath تەلەارناسى يران بيلىگى يراكپەن شەكارالاس ايماقتا اۋە كەڭىستىگىن جابۋعا بۇيرىق بەرگەنىن حابارلاعان. بۇل اقپارات اقش تاراپىنان اۋە سوققىسى بولۋى مۇمكىن دەگەن جورامالدارعا تۇرتكى بولدى.
بۇل جاعدايعا قاتىستى كەرولاين ليۆيتت: «پرەزيدەنت ترامپتىڭ نە ىستەيتىنىن تەك ءوزى عانا بىلەدى. ونىڭ جوسپارىنان وتە از عانا كەڭەسشىلەر توبى حاباردار»، – دەدى.
14 قاڭتاردا يراننىڭ سوت بيلىگى باسشىسى گوليام حوسەين موحسەني-ەدجەي نارازىلىق كەزىندە ۇستالعان 18 مىڭ ادامعا قاتىستى سوت ىستەرىن جەدەلدەتىپ، ولاردىڭ ءبىر بولىگىنە ءولىم جازاسىن قاراستىرۋ قاجەتتىگىن ايتقان.
الايدا يراننىڭ سىرتقى ىستەر ءمينيسترى ابباس اراگچي Fox News ارناسىنا بەرگەن سۇحباتىندا ەل بيلىگىنىڭ «ادامداردى دارعا اسۋعا مۇلدە جوسپارى جوق» ەكەنىن مالىمدەدى.
ايتا كەتسەك، جاپپاي نارازىلىقتار 2025 جىلدىڭ 28 جەلتوقسانىندا باستالعان. سول كۇنى تەگەراندا دۇكەن يەلەرى ەكونوميكالىق جاعدايدىڭ ناشارلاۋىنا نارازىلىق ءبىلدىرىپ، ساۋدا ورىندارىن جاپقان. كەيىن بۇل اكتسيالار باسقا دا ءىرى قالالارعا تاراعان.
30 جەلتوقساندا نارازىلىق بىلدىرۋشىلەر مەن پوليتسيا اراسىندا قاقتىعىس بولعانى، كۇشتىك قۇرىلىمداردىڭ كوزدەن جاس اعىزاتىن گاز قولدانعانى تۋرالى اقپارات تارادى. ۋاقىت وتە كەلە شەرۋلەر ساياسي سيپات الىپ، قاتىسۋشىلار بيلىكتىڭ اۋىسۋىن تالاپ ەتىپ، «ديكتاتورعا ءولىم!» دەگەن ۇراندار ايتا باستاعان.
يران ەكونوميكاسى جوعارى ينفلياتسيا (40% دەڭگەيىندە) جانە باتىس سانكتسيالارى سالدارىنان قيىن جاعدايدا ەكەنى ايتىلىپ وتىر.
اقش پرەزيدەنتى دونالد ترامپ 2 قاڭتار كۇنى Truth Social الەۋمەتتىك جەلىسىندە ەگەر كۇشتىك قۇرىلىمدار بەيبىت شەرۋشىلەرگە وق اتسا، اقش ارالاسۋى مۇمكىن ەكەنىن ەسكەرتكەن.
كەيىن نارازىلىقتار تارتىپسىزدىككە ۇلاسىپ، تەگەران مەرى اليرەزا زاكانيدىڭ مالىمەتىنشە، 9 قاڭتارعا قاراعان ءتۇنى 50-دەن استام بانك پەن بىرنەشە مەملەكەتتىك مەكەمە ورتكە ورانعان. سونداي-اق 30-دان استام مەشىتتىڭ جانىپ كەتكەنى حابارلاندى.
