ماڭعىستاۋ وبلىسىنىڭ قالا جانە اۋداندارىندا ۇيىمداستىرىلعان مەرەكەلىك ءىس-شارالار ۇلتتىق داستۇرلەر مەن زاماناۋي فورماتتى ۇيلەستىرىپ، ءوڭىر تۇرعىندارى مەن قوناقتارىنا ەرەكشە مەرەكەلىك كوڭىل-كۇي سىيلادى. جالپى وبلىس بويىنشا ناۋرىز مەرەكەسىنە 60 مىڭنان استام ادام قاتىسىپ، 134 كيىز ءۇي تىگىلدى.
مەرەكەنىڭ نەگىزگى شاراسى وبلىس ورتالىعى اقتاۋ قالاسىندا ءوتتى. كاسپي تەڭىزىنىڭ جاعالاۋىنى 25 مىڭنان استام ادام جينالىپ، اقشاڭقان 33 كيىز ءۇي ورناتىلدى.
مەرەكەنىڭ باستى ەرەكشەلىكتەرىنىڭ ءبىرى – «Digital Nauryz» جوباسى اياسىنداعى تسيفرلىق كيىز ءۇي بولدى. مۇندا كەلۋشىلەرگە ينتەراكتيۆتى تەحنولوگيالىق ايماقتار ۇسىنىلدى: ادام ءتارىزدى «ناۋرىز» روبوتى، «تازى» روبوت-ءيتى، سونداي-اق شاي قۇياتىن «Shai-tech» جوباسى تانىستىرىلدى. قوناقتار VR/AR تەحنولوگيالارىمەن، ۆيرتۋالدى ويىندارمەن تانىسىپ، وقۋشىلار ازىرلەگەن قازاق حاندىعى داۋىرىنە ارنالعان VR-جوباعا ەرەكشە قىزىعۋشىلىق تانىتتى. سونىمەن قاتار 3D باسپا مۇمكىندىكتەرى مەن وڭىرلىك IT جوبالار ۇسىنىلدى.
22 ناۋرىز كۇنى مەرەكەلىك باعدارلامالار «بەرەكەلى ناۋرىز – مەرەكەلى شەرۋ» اتتى ۇلتتىق ونەر مەن ءداستۇردى ۇلىقتاعان شەرۋمەن باستالدى. شەرۋگە ۇلتتىق كيىم كيگەن تۇرعىندار، ونەرپازدار جانە ەتنومادەني بىرلەستىكتەر قاتىستى.
امفيتەاتر ساحناسىندا «ناۋشا ناۋرىز – باق، ىرىستىڭ باستاۋى» اتتى اۋقىمدى تەاترلاندىرىلعان قويىلىم قويىلدى. سونىمەن قاتار قازاق كۇرەسى، لاڭگى تەبۋ، ارقان تارتۋ جانە قول كۇرەس سەكىلدى ۇلتتىق سپورت تۇرلەرىنەن جارىستار ۇيىمداستىرىلىپ، وعان ءار وڭىردەن كەلگەن سپورتشىلار قاتىستى.
كونتسەرتتىك باعدارلاما اياسىندا بەلگىلى ونەرپازدار – اقىلبەك جەمەنەي، عادىلبەك جاڭاي، سونداي-اق وزبەكستاندىق انشىلەر شىراز نۋراتدينوۆ پەن ينابات دجۋمانيازوۆا ونەر كورسەتتى. مەرەكە ماڭعىستاۋ وبلىستىق فيلارمونياسى ارتىستەرىنىڭ كونتسەرتىمەن قورىتىندىلاندى.
بەينەۋ اۋدانىندا مەرەكەلىك ءىس-شارالار ءالي بالتا پالۋان اتىنداعى ورتالىق ستاديوندا ءوتتى. وعان 23 كيىز ءۇي تىگىلىپ، 8 مىڭنان استام ادام قاتىستى. مۇندا دا روبوتوتەحنيكا كورمەسى ۇيىمداستىرىلدى.
تۇپقاراعان اۋدانىنداعى نەگىزگى شارالار فورت-شەۆچەنكو قالاسىنىڭ ورتالىق الاڭىندا ءوتتى. 11 كيىز ءۇي ورناتىلىپ، 2 مىڭنان استام ادام جينالدى. وقۋشىلار ازىرلەگەن روبوتتار كورمەسىمەن تسيفرلىق ايماق ۇسىنىلدى.
جاڭاوزەن قالاسىندا مەرەكەلىك ءىس-شارالار بىرنەشە كۇنگە جالعاستى. قالا مەن اۋىل ايماقتاردا بارلىعى 31 كيىز ءۇي تىگىلىپ، 10 مىڭنان استام ادام جينالدى. تسيفرلىق فورمات اياسىندا «وزەنمۇنايگاز» اق جاستارى ۇيىمداستىرعان روبوتتار تانىستىرىلدى.
قاراقيا اۋدانىندا مەرەكەلىك ءىس-شارالار قۇرىق، جەتىباي جانە مۇنايشى اۋىلدارىندا ۇيىمداستىرىلىپ، 15 كيىز ءۇي تىگىلدى، 2–3 مىڭعا جۋىق تۇرعىن ناۋرىز دۋمانىنا كۋا بولدى.
ماڭعىستاۋ اۋدانىندا نەگىزگى مەرەكەلىك شارالار شەتپە اۋىلىندا ءوتىپ، 10 كيىز ءۇي تىگىلدى، 4 مىڭنان استام ادام جينالدى.
ال مۇنايلى اۋدانىنداعى ماڭعىستاۋ اۋىلىندا 11 كيىز ءۇي ورناتىلىپ، مەرەكەگە 8 مىڭنان استام تۇرعىن قاتىستى.
جالپى، وبلىستىڭ بارلىق قالا جانە اۋداندارىندا ۇيىمداستىرىلعان مەرەكەلىك ءىس-شارالار كەشكى كونتسەرتتىك باعدارلامالارمەن قورىتىندىلانىپ، كورەرمەندەرگە ەرەكشە اسەر مەن كوتەرىڭكى كوڭىل-كۇي سىيلادى.
