ماڭعىستاۋ وبلىسىندا 17 جاستاعى ساعىندىق قۋانىشبەكوۆتىڭ جۇمباق جاعدايدا قازا تاپقان، دەپ حابارلايدى “ادىرنا” ۇلتتىق پورتالى Lada.kz-كە سىلتەپ.
مارقۇمنىڭ تۋىستارى بۇل وقيعانى جاي عانا جازاتايىم جاعداي ەمەس، قاساقانا جاسالعان قىلمىس دەپ ەسەپتەيدى.
وقيعا 8 ءساۋىر كۇنى بولعان. سول كەشتە ساعىندىق ۇيىنەن شىعىپ كەتكەن. تۇنگى ساعات 23:00-23:30 شاماسىندا ونىڭ دوستارى بالانىڭ دەنەسىن ۇيگە اكەلىپ تاستاعان. ولار ساعىندىقتىڭ جاي عانا قۇلاپ قالعانىن ايتقان. الايدا دەنەسىندە سوققى ىزدەرى بولعانىن بايقاعان تۋىستارى بىردەن كۇماندانعان.
مارقۇمنىڭ تۋىسى، زاڭگەر اجار ابديل بۇل جايتتى Facebook پاراقشاسىندا جاريالاپ، ماڭعىستاۋ وبلىستىق پوليتسيا دەپارتامەنتىنە رەسمي ساۋال جولدادى. ونىڭ ايتۋىنشا، ساعىندىق سول كەشتە دوستارىمەن جۇرگەن. ال دوستارى كەيىنىرەك اۋىلداعى ۇلكەن بالالار تاراپىنان قىسىم بولعانىن مويىنداعان. ولار جاسوسپىرىمدەردى قاتارعا تۇرعىزىپ، ۇرعانىن، ساعىندىقتىڭ سوققىدان كەيىن قۇلاپ، ەسىنەن تانعانىن ايتقان.
مارقۇمنىڭ تۋىسى ساكەن قۋانىشبەكوۆتىڭ سوزىنشە، دەنە اقتاۋداعى مايىتحاناعا جىبەرىلگەن. سوت-مەديتسينالىق ساراپتاما ءولىمنىڭ كۇش قولدانۋدان بولۋى مۇمكىن ەكەنىن كورسەتكەن. بىراق رەسمي قورىتىندى ءالى جاريالانعان جوق.
«بۇل – زورلىق-زومبىلىقپەن كەلگەن ءولىم. ونى قاتتى ۇرعان. دوستارىنىڭ تەلەفوندارىنان بارلىق جازبالار مەن حاتتار وشىرىلگەن. تەك مەنىڭ باۋىرىمنىڭ تەلەفونىن اشا الماعان، وندا ءبارى ساقتالعان. ساراپتاما ناتيجەسىن كۇتىپ وتىرمىز»، – دەيدى ساكەن.
قازا تاپقان بالانىڭ جاقىندارى ساعىندىقتىڭ ءولىمىن زورلىق-زومبىلىقپەن كەلگەن ءولىم رەتىندە تانۋدى تالاپ ەتىپ وتىر. ولار بارلىق كۇدىكتىلەردىڭ قاماۋعا الىنىپ، تەرگەۋ ءادىل جۇرگىزىلۋى قاجەت ەكەنىن ايتىپ، قوعامنان قولداۋ سۇرايدى.
