يراندا ەل پرەزيدەنتى ماسۋد پەزەشكياننىڭ قىزمەتىنەن كەتۋى مۇمكىن ەكەنى تۋرالى اقپارات تاراۋدا. بۇل مالىمەتتەر رەسمي تۇردە راستالماعانىمەن، بىرقاتار دەرەككوزدەر ونىڭ بيلىك ىشىندەگى شەكتەۋلى رولىنە بايلانىستى وسىنداي قادامعا بارۋى ىقتيمال ەكەنىن ايتادى، دەپ حابارلايدى "ادىرنا".
مالىمەتتەرگە قاراعاندا، يراندىق ىقپالدى ساياساتكەر ءالي لاريدجاني قايتىس بولعاننان كەيىن پەزەشكيان وتستاۆكا ماسەلەسىن قاراستىرا باستاعان. ول بۇل شەشىمدى تالقىلاۋ ءۇشىن يراننىڭ جوعارعى كوشباسشىسى ءالي حامەنەيمەن كەزدەسۋدى جوسپارلاعانى دا ايتىلۋدا.
الايدا يسلام رەۆوليۋتسياسى ساقشىلارى كورپۋسى (كسير) ارالاسقانى حابارلاندى. ءيزرايلدىڭ 12-ارناسىنىڭ مالىمەتىنشە، بۇل كەزدەسۋ مۇمكىن بولماعان. بۇل دەرەك رەسمي تۇردە راستالماعانىمەن، ەلدەگى بيلىك تارماقتارى اراسىنداعى ىقپال كۇرەسى تۋرالى پىكىرتالاستاردى كۇشەيتتى.
كەيبىر مالىمەتتەرگە سايكەس، پەزەشكيان ءوزىنىڭ جاقىن ورتاسىندا ەلدەگى ناقتى وكىلەتتىكتەرىنىڭ شەكتەۋلى ەكەنىن اشىق ايتقان.
«ولار (كسير) ماعان ءىس جۇزىندە ەشتەڭە ىستەۋگە مۇمكىندىك بەرمەيدى. ەلدەگى نەگىزگى پروتسەستەردەن، اسىرەسە اسكەري جانە ستراتەگيالىق شەشىمدەردەن تولىق شەتتەتىلگەنمىن. ماعان تەك فورمالدى قىزمەت بەرىلگەن. كەي جاعدايلاردا جوعارعى كوشباسشىمەن بايلانىسىپ، ءوز پىكىرىمدى جەتكىزۋ مۇمكىندىگىم دە جوق. وسىنداي جاعدايدا مەن ءوزىمدى بۇل جۇيەگە قاجەت ەمەس ادام سياقتى سەزىنەمىن»، - دەگەن ول.
ايتا كەتەيىك، پرەزيدەنت قاسىم-جومارت توقاەۆ رەفەرەندۋمدا يراندى ايتىپ، قوس بيلىكتىڭ بولماۋى كەرەگىن جانە قازاقستان ونى وتكەرگەنىن ەسكە سالعان بولاتىن.
“يراندا ءدىني بيلىك نەگىزگى باعىت-باعداردى ايقىنداپ، شەشىم قابىلدايدى. پرەزيدەنت تە بار، بىراق ول — فورمالدى مەملەكەت باسشىسى، ءىس جۇزىندە ىقپالدى تۇلعا سانالمايدى. جالپى، كەز كەلگەن ەلدە، سونىڭ ىشىندە قازاقستاندا قوس بيلىك بولماۋعا ءتيىس. كەزىندە مۇنداي جۇيەنى ءبىز دە باستان وتكەردىك، بىراق بايانسىز بولدى. ءتورت جىل بۇرىن ەلىمىزدىڭ ىشكى تۇراقتىلىعىنا قاۋىپ ءتوندى. بۇل قازاقستانعا دا، باسقا مەملەكەتتەرگە دە ۇلكەن ساباق بولدى دەپ ويلايمىن. ءبىز يران حالقىنا، ونىڭ مادەنيەتى مەن تاريحىنا قۇرمەتپەن قارايمىز. سوندىقتان ءوز ۇستانىمىمىزدان اينىعان جوقپىز، ءاردايىم بەيبىتسۇيگىش ەل بولىپ قالا بەرەمىز”، - دەگەن ەدى پرەزيدەنت.
