اقش يراننىڭ ەڭ ءىرى يادرولىق ينفراقۇرىلىمىنا اۋە شابۋىل جاساعاننان كەيىن يران يزرايلگە زىمىران اتقىلاي باستادى، دەپ حابارلايدى “ادىرنا” ۇلتتىق پورتالى.
بۇل شابۋىلدى يزرايل قورعانىس ارمياسى راستادى. جەرگىلىكتى باق-تىڭ حابارلاۋىنشا، يزرايلگە قاراي 25–35 بالليستيكالىق زىمىران جىبەرىلگەن. زىمىران سىنىقتارى تۇسكەن ايماقتاردا ءورت شىعىپ، بىرنەشە ادام جاراقات الدى.
بۇۇ باس حاتشىسى انتونيۋ گۋتەرريش بۇل جاعدايعا بايلانىستى مالىمدەمە جاساپ، اقش-تىڭ ارەكەتىن «قاۋىپتى ەسكالاتسيا» دەپ اتاپ، جاعدايدىڭ ۋشىعىپ كەتۋى مۇمكىن ەكەنىن ەسكەرتتى.
«وسىنداي قاۋىپتى ساتتە حاوس سپيرالىنە ءتۇسىپ كەتۋدەن بارىنشا اۋلاق بولۋ ماڭىزدى. بۇل ماسەلەنىڭ اسكەري شەشىمى جوق. العا اپارار جالعىز جول – ديپلوماتيا»، – دەدى گۋتەرريش.
Reuters اگەنتتىگى تاراتقان اقپاراتقا سايكەس، يراننىڭ ۇلتتىق اتوم اگەنتتىگى «ەلدىڭ وندىرىستىك دامۋ پروتسەسىن» ەشكىم توقتاتا المايدى دەپ مالىمدەپ، اقش-تىڭ ارەكەتىن حالىقارالىق قۇقىق پەن يادرولىق قارۋدى تاراتپاۋ تۋرالى شارتتى بۇزۋ دەپ باعالادى. سونداي-اق، حالىقارالىق اتوم ەنەرگياسى اگەنتتىگىن ۇنسىزدىگى ءۇشىن ايىپتادى.
حۋسيتتەر قوزعالىسى دا يرانعا قولداۋ ءبىلدىردى. قوزعالىستىڭ ساياسي بيۋروسىنىڭ مۇشەسى مۇحاممەد ءال-بۋحەيتي «ال-دجازيرا» تەلەارناسىنا بەرگەن سۇحباتىندا:
«اقش-قا جاۋاپ بەرۋ – ۋاقىت ماسەلەسى. يران بىزدەن كومەك سۇرامادى، بىراق ءبىز كۇتپەي-اق قولداۋ كورسەتەمىز»، – دەدى.
ايتا كەتەيىك، 22 ماۋسىمدا اقش يرانداعى ءۇش يادرولىق نىسان — فوردو، ناتانز جانە يسفاحانعا اۋە سوققىسىن جاسادى.
