قىرعىزستان پارلامەنتىنىڭ سپيكەرى نۇرلانبەك تۇرعىنبەكۇلى بەيسەنبى كۇنى وتكەن وتىرىستا وتستاۆكاعا كەتەتىنىن مالىمدەدى، دەپ حابارلايدى «ادىرنا» ءتىلشىسى.
«ەلدە بولعان ساياسي وقيعالارعا بايلانىستى مەن ءبىر نەمەسە ەكى ادامعا قىزمەت ەتپەيتىنىمدى ايتقىم كەلەدى. مەن حالىققا، مەملەكەتكە جانە پارلامەنتكە قىزمەت ەتەمىن. ءوز ەركىممەن قىزمەتتەن كەتۋ تۋرالى شەشىم قابىلدادىم. بۇل — سىرتقى قىسىمسىز قابىلدانعان جەكە شەشىمىم»،- دەدى ول.
سپيكەردىڭ وتستاۆكاسى تۋرالى ماسەلە قىرعىزستان ۇلتتىق قاۋىپسىزدىك مەملەكەتتىك كوميتەتىنىڭ باسشىسى قامشىبەك تاشيەۆ قىزمەتتەن بوساتىلعان ساتتەن باستاپ تالقىلانىپ كەلگەن. الايدا پارلامەنتتە بۇل اقپارات جوققا شىعارىلعان ەدى.
نۇرلانبەك تۇرعىنبەكۇلى VIII شاقىرىلىم پارلامەنتىنىڭ توراعاسى بولىپ 2025 جىلعى 17 جەلتوقساندا سايلانعان. بۇعان دەيىنگى شاقىرىلىمدا دا ول ەلدىڭ زاڭ شىعارۋ ورگانىن باسقارعان.
ايتا كەتەيىك، بۇعان دەيىن سادىر جاپاروۆ قىرعىزستان ۇقمك توراعاسى قامشىبەك تاشيەۆتى جانە ونىڭ ءۇش ورىنباسارىن قىزمەتتەن بوساتقان بولاتىن. پرەزيدەنت بۇل شەشىمىن مەملەكەت بىرلىگىن نىعايتىپ، قوعامداعى الاۋىزدىققا جول بەرمەۋ قاجەتتىلىگىمەن ءتۇسىندىردى.
ۇقمك توراعاسىنىڭ مىندەتىن ۋاقىتشا اتقارۋشى بولىپ جۇمعالبەك شابدانبەكوۆ تاعايىندالدى.
