بيىل قازاق كينو ونەرىنىڭ كورنەكتى وكىلى، تۇڭعىش كاسىبي ايەل كينورەجيسسەر داريعا ءتىنالينانىڭ تۋعانىنا 105 جىل تولىپ وتىر، دەپ حابارلايدى "ادىرنا" ۇلتتىق پورتالى.
ول وتاندىق كينەماتوگرافيانىڭ قالىپتاسۋىنا ەلەۋلى ۇلەس قوسقان تۇلعالاردىڭ ءبىرى رەتىندە تاريحتا قالدى.
داريعا ءتىنالينا 1921 جىلى 17 ناۋرىزدا اقمولا وبلىسىندا دۇنيەگە كەلگەن. ول ءونەر جولىن الماتى تەاتر ۋچيليششەسىندە باستاعان ول كەيىن ماسكەۋدەگى كينەماتوگرافيا ينستيتۋتىندا ءبىلىم الىپ، رەجيسسەرلىك ماماندىقتى يگەردى. ونىڭ ۇستازدارى قاتارىندا الەكساندر دوۆجەنكو مەن لەۆ كۋلەشوۆ سەكىلدى كينو الەمىنىڭ ءىرى تۇلعالارى بولدى.
شىعارماشىلىق قىزمەتىن اكتريسا رەتىندە باستاپ، بىرقاتار فيلمدەرگە تۇسكەن ءتىنالينا كەيىن رەجيسسۋراعا بەت بۇردى. العاشقى جۇمىستارىنىڭ ءبىرى – «قازاقستان كەڭىستىگىندە» دەرەكتى ءفيلمى. كەيىن ول موسفيلم ستۋدياسىندا تاجىريبە جيناقتاپ، ءىرى جوبالارعا قاتىستى.
1964 جىلدان باستاپ قازاقفيلم كينوستۋدياسىندا ەڭبەك ەتكەن رەجيسسەر قازاق تىلىندەگى دۋبلياج سالاسىنىڭ دامۋىنا ايرىقشا ۇلەس قوستى. ونىڭ قاتىسۋىمەن مىڭنان استام فيلم قازاق تىلىنە اۋدارىلىپ، دىبىستالدى.
2008 جىلى ونىڭ «اق-قارا كينو» اتتى ەڭبەگى جارىق كورىپ، وتاندىق كينو تاريحىن زەرتتەۋشىلەر ءۇشىن ماڭىزدى دەرەككوزگە اينالدى.
داريعا ءتىنالينا 2011 جىلى دۇنيەدەن ءوتتى.
