20 قىركۇيەك كۇنى الماتىدا XI Baiqonyr Film Festival-ءدىڭ اشىلۋ سالتاناتى ءوتتى. فەستيۆال 25 قىركۇيەككە دەيىن جالعاسادى. باعدارلاماعا ۇلتتىق جانە حالىقارالىق قىسقامەتراجدى ويىن جانە دەرەكتى فيلمدەر بايقاۋى، دەبيۋتتىك تولىقمەتراجدى فيلمدەر بايقاۋى، ارنايى كورسەتىلىمدەر مەن كاسىبي ءىس-شارالار ەنگەن.
اشىلۋ سالتاناتى «ارمان» كينوتەاترىندا ءوتتى. فەستيۆال شارالارىنىڭ باسىم بولىگى دە وسى جەردە ۇيىمداستىرىلادى. Baiqonyr Film Festival پرەزيدەنتى انۋار كەنجەباەۆ قوناقتارمەن امانداسىپ، XI فەستيۆالدى اشىق دەپ جاريالادى. فەستيۆالدىڭ باعدارلامالىق ديرەكتورى ەرجان دجۋمابەكوۆ تە قاتىسۋشىلار مەن كورەرمەندەرگە ءسوز ارنادى.
سالتانات بارىسىندا بايقاۋ باعدارلامالارىنىڭ قازىلار القاسى تولىق تانىستىرىلدى. قازىلار القاسىنىڭ توراعالارى ساحناعا شىعىپ، قاتىسۋشىلاردى فەستيۆالدىڭ باستالۋىمەن قۇتتىقتاپ، ساتتىلىك تىلەدى.
حالىقارالىق بايقاۋدىڭ قازىلار القاسىنا توراعالىق ەتەتىن دارەجان ومىرباەۆ قىسقامەتراجدى كينونىڭ تابيعاتى مەن اۆتوردىڭ العاشقى شىعارماشىلىق قادامى تۋرالى ايتتى.
«قىسقامەتراجدى كينودا اۆتورلار وزدەرىنىڭ العاشقى، ەڭ تازا سەزىمدەرىن جەتكىزۋگە تىرىسادى. ارينە، كەيىن ولاردىڭ ءبارى بىردەي كينو سالاسىندا قالماۋى مۇمكىن، كوپ نارسە تالانتقا بايلانىستى. بىراق العاشقى شىعارماشىلىق يمپۋلس ءاردايىم شىنايى بولادى. بۇل العاشقى ماحاببات سياقتى. ول ارقاشان تازا»، دەدى دارەجان ومىرباەۆ.
فەستيۆال ايانا نۇردينوۆانىڭ «Mūğalım» فيلمىمەن اشىلدى. 20 قىركۇيەك فيلم كومانداسى ءۇشىن ەرەكشە كۇن بولدى. كارتينا ءبىر كۇندە ەكى فەستيۆالدە كورەرمەنگە جول تارتتى. الماتىدا «Mūğalım» Baiqonyr Film Festival-ءدىڭ اشىلۋ ءفيلمىنىڭ ءبىرى بولسا، ءدال سول كۇنى فيلم سان-سەباستيان حالىقارالىق كينوفەستيۆالىندە دە كورسەتىلدى.
رەجيسسەر ايانا نۇردينوۆا، پروديۋسەر ارۋجان دوسىمقوجا جانە باستى ءرولدى سومداعان ولجاس دالەلحان سول كۇنى سان-سەباستياندا بولدى. الماتىداعى كورسەتىلىم الدىندا كورەرمەندەرگە ولاردىڭ فەستيۆالدىڭ اشىلۋىنا ارنايى جولداعان ۆيدەوسالەمى كورسەتىلدى.
«ارمان» كينوتەاترىنىڭ ساحناسىنا الماتىدا قالعان فيلم كومانداسىنىڭ وكىلدەرى دە شىقتى. كورەرمەندەرمەن اكتەرلەر باقىتجان الپەيىس، گۋلنارا دۋسماتوۆا، اكيف پەتروۆ، شىنار جانىسبەكوۆا جانە جوبانىڭ ماركەتينگ جەتەكشىسى سەۆيل بايراموۆا امانداستى.
سەۆيل بايراموۆا ءفيلمدى ءبىر كۇندە ەكى بىردەي فەستيۆال الاڭىندا تانىستىرۋ كوماندا ءۇشىن ەرەكشە ءسات ەكەنىن ايتتى. ول ءدال سول ۋاقىتتا ايانا نۇردينوۆا، ارۋجان دوسىمقوجا جانە ولجاس دالەلحان سان-سەباستيانداعى كورسەتىلىمگە قاتىسىپ جاتقانىن اتاپ ءوتتى.
اشىلۋ سالتاناتى مەن «Mūğalım» ءفيلمىنىڭ كورسەتىلىمى كورەرمەنگە تولى زالدا ءوتتى.
«Mūğalım» بالقاشتا تۇراتىن مۋزىكا مۇعالىمى جاندوس تۋرالى باياندايدى. ۇلكەن قالاعا كوشۋدى ارمانداعان كەيىپكەردىڭ الدىنان ءومىرىن وزگەرتۋگە مۇمكىندىك تۋادى. سول مۇمكىندىك ونى ءوزى ءۇشىن شىن مانىندە نە ماڭىزدى ەكەنىن جانە ونەردىڭ ومىرىندەگى ورنىن قايتا تارازىلاۋعا ءماجبۇر ەتەدى. فيلمدە ولجاس دالەلحان، رۋستەم جانىامانوۆ، شىنار جانىسبەكوۆا جانە باسقا اكتەرلەر وينايدى.
بيىل حالىقارالىق قىسقامەتراجدى ويىن جانە دەرەكتى فيلمدەر بايقاۋىنا 12 فيلم ىرىكتەلدى. بايقاۋعا 38 ەلدەن 466 ءوتىنىم ءتۇستى. ۇلتتىق بايقاۋدا 16 قازاقستاندىق قىسقامەتراجدى فيلم باق سىنايدى. سونىمەن قاتار دەبيۋتتىك تولىقمەتراجدى فيلمدەرگە ارنالعان جەكە بايقاۋ وتەدى.
فەستيۆال كۇندەرى كورەرمەندەر كونكۋرس جانە ارنايى كورسەتىلىمدەردى تاماشالاپ، فيلم اۆتورلارىمەن كەزدەسىپ، تالقىلاۋلار مەن كاسىبي ءىس-شارالارعا قاتىسا الادى. سونىمەن قاتار الماتىدا تمد ەلدەرى كينوتانۋشىلارى مەن كينو سىنشىلارىنىڭ V الماتى فورۋمى ءوتىپ جاتىر.
بيىل حالىقارالىق قىسقامەتراجدى جانە دەبيۋتتىك بايقاۋلاردىڭ جەڭىمپازدارىنا New York Film Academy-دا ءبىلىم الۋعا ارنالعان ارقايسىسى 10 000 دوللارلىق التى سەرتيفيكات تابىستالادى. سەرتيفيكاتتاردى اكادەميانىڭ قابىلداۋ تالاپتارىنا ساي كەلەتىن جەڭىمپازدار وقۋ اقىسىنىڭ ءبىر بولىگىن وتەۋگە پايدالانا الادى.
اشىلۋ سالتاناتىندا ۇيىمداستىرۋشىلار فەستيۆالدىڭ سەرىكتەستەرى مەن اقپاراتتىق سەرىكتەستەرىنە قولداۋى ءۇشىن العىس ءبىلدىردى.
XI Baiqonyr Film Festival 25 قىركۇيەكتە ماراپاتتاۋ راسىمىمەن اياقتالادى. سول كۇنى بايقاۋ باعدارلامالارىنىڭ جەڭىمپازدارى جاريالانىپ، جۇلدەلەر تابىستالادى. بيىل ابدوللا قارساقباەۆتىڭ تۋعانىنا 100 جىل تولۋىنا وراي ارنايى ماراپات تا بەرىلەدى.
فەستيۆال ءداستۇرلى تۇردە تمد-عا قاتىسۋشى مەملەكەتتەردىڭ گۋمانيتارلىق ىنتىماقتاستىق جونىندەگى مەملەكەتارالىق قورىنىڭ قولداۋىمەن ءوتىپ جاتىر.
