اباي اتىنداعى قازاق ۇلتتىق پەداگوگيكالىق ۋنيۆەرسيتەتى مەن احمەت بايتۇرسىنۇلى اتىنداعى ءتىل ءبىلىمى ينستيتۋتى اياسىندا تۇراقتى جۇمىس ىستەيتىن فيلولوگيا عىلىمدارى زەرتتەۋلەرىن ساراپتامالىق ۇيلەستىرۋ ورتالىعىنىڭ كەزەكتى وتىرىسى ءوتتى.
كورنەكتى ءتىلتانۋشى عالىم، اكادەميك شورا سارىباەۆتىڭ تۋعان كۇنىنە ورايلاستىرىلعان باسقوسۋعا قر عىلىم جانە جوعارى ءبىلىم مينيسترلىگى، حالىقارالىق «قازاق ءتىلى» قوعامىنىڭ الماتى قالالىق فيليالى قولداۋ كورسەتىپ وتىر.
«فيلولوگيا عىلىمدارىنىڭ زەرتتەلۋى: وزەكتى ماسەلەلەرى جانە شەشۋ جولدارى» تاقىرىبىنا ارنالعان جيىندا وتاندىق ءتىلتانىم عىلىمىن جۇيەلەۋ، عىلىمي ىزدەنىستەردىڭ باعىت-باعدارىن ايقىنداۋ، ديسسەرتاتسيالىق جۇمىستاردىڭ مازمۇندىق ساپاسىن كۇشەيتۋ ماسەلەلەرى تالقىلاندى. وتىرىستى قر پرەزيدەنتى جانىنداعى ۇعا ديرەكتورلار كەڭەسىنىڭ تاۋەلسىز ديرەكتورى، اكادەميك كارىمبەك قۇرماناليەۆ جۇرگىزدى. بۇل وتىرىستا ورتالىق فيلولوگيا عىلىمدارى بويىنشا ەلىمىزدەگى ءىرى جوعارى وقۋ ورىندارىنىڭ ديسسەرتاتسيالىق كەڭەس باسشىلارىن ءبىر جەرگە جيناپ، قوعامدا قىزۋ تالقىعا ءتۇسىپ جۇرگەن تاقىرىپتاردى كۇن تارتىبىنە شىعاردى.
– عىلىم سالاسىنداعى مۇنداي جۇمىس زور جاۋاپكەرشىلىكتى تالاپ ەتەدى. بۇگىندە ورتالىق عىلىمي وي-پىكىر الماساتىن، زەرتتەۋلەر ساراپتالاتىن بەدەلدى الاڭعا اينالىپ وتىر. بۇل تەك اكادەميالىق مىندەت قانا ەمەس، سونىمەن قاتار ۇلتتىق بولمىستى ايقىندايتىن ستراتەگيالىق باعىت. ورتالىق قىزمەتى ساراپتامالىق زەرتتەۋلەرمەن عانا شەكتەلمەي، فيلولوگيا عىلىمدارىنىڭ دامۋىنا سەرپىن بەرەتىن اۋقىمدى مىندەتتەردى قامتيدى، – دەدى جيىندى اشقان اباي اتىنداعى قازۇپۋ باسقارما توراعاسى-رەكتورى بولات تىلەپ.
ساراپتامالىق ۇيلەستىرۋ ورتالىعى وتاندىق فيلولوگيا عىلىمدارىنىڭ دامۋىنا جۇيەلى تۇردە ۇلەس قوسۋدى ماقسات ەتەدى. وندا عىلىمي ديسسەرتاتسيا تاقىرىپتارىن بىرىڭعاي بازا ارقىلى قاداعالاۋ، تالقىلاۋدان وتكىزۋ ت.ب. وزەكتىلىكتەردى قاراستىردى. عالىمدار بارلىق عىلىمي جۇمىستاردىڭ ءبىر ورتالىقتان ۇيلەستىرىلۋى زەرتتەۋ باعىتتارىنىڭ ۇيلەسىمدى دامۋىنا مۇمكىندىك بەرەدى دەگەن بايلامعا كەلدى. جاس عالىمداردى قولداۋ، ولاردىڭ عىلىمي ديسسەرتاتسيالارىن سۇيەمەلدەۋ دە كوڭىلگە دەمەۋ بەرەدى.
عىلىم جانە جوعارى ءبىلىم سالاسىنداعى ساپانى قامتاماسىز ەتۋ كوميتەتىنىڭ توراعاسى ادىلەت تويباەۆ «كەيبىر دوكتورانتتاردىڭ ديسەرتاتسيا تاقىرىپتىڭ قايتالانۋى، كوشىرىلۋى سەكىلدى ماسەلەلەر جەتكىلىكتى. بۇل قاناتقاقتى جوبا. ەگەر جەمىسىن بەرسە، باسقا دا سالالارعا ەنگىزەمىز» دەپ، فيلولوگيا عىلىمدارى زەرتتەۋلەرىن ساراپتامالىق ۇيلەستىرۋ ورتالىعى جۇمىسىنا قر عىلىم جانە جوعارى ءبىلىم مينيسترلىگى تاراپىنان قولداۋ بولاتىنىن جەتكىزدى. ال قر پرەزيدەنتى جانىنداعى ۇعا وكىلى جەڭىسبەك تولەن، جوو-لاردىڭ جانىنداعى ديسسەرتاتسيالىق كەڭەس توراعالارى مەن جەتەكشى عالىمدار فاۋزيا ورازباەۆا، ديحان قامزابەكۇلى، قالبيكە ەسەنوۆا، انار فازىلجان كوتىرىلگەن تاقىرىپقا بايلانىستى جان-جاقتى پىكىرلەرىن ءبىلدىرىپ، كەلەلى ۇسىنىستارىن ايتتى.
سونداي-اق، ورتالىقتىڭ ءبىرىنشى ورىنباسارى قالبيكە ەسەنوۆا ساراپتامالىق ۇيلەستىرۋ ورتالىعىنىڭ بولاشاقتا جۇمىس ىستەۋ الگوريتمىن ءتۇسىندىرىپ بەردى. جيىن قورىتىندىسىندا زەرتتەۋلەردىڭ ساپاسىن كۇشەيتۋ، عىلىمي تالاپتاردى جەتىلدىرۋ جانە ۇلتتىق عىلىمي دەرەكتەردىڭ تسيفرلىق ەكوجۇيەسىن قالىپتاستىرۋ ارنايى قارار قابىلداندى.
ساراپتامالىق ۇيلەستىرۋ ورتالىعى الداعى ۋاقىتتا دا وسى باعىتتاعى جۇمىستارىن جالعاستىرا بەرمەك.
«Abai University» مەديا ورتالىعى
