Abai atyndaǧy Qazaq ūlttyq pedagogikalyq universitetı men Ahmet Baitūrsynūly atyndaǧy Tıl bılımı instituty aiasynda tūraqty jūmys ısteitın Filologiia ǧylymdary zertteulerın saraptamalyq üilestıru ortalyǧynyŋ kezektı otyrysy öttı.
Körnektı tıltanuşy ǧalym, akademik Şora Sarybaevtyŋ tuǧan künıne orailastyrylǧan basqosuǧa QR Ǧylym jäne joǧary bılım ministrlıgı, Halyqaralyq «Qazaq tılı» qoǧamynyŋ Almaty qalalyq filialy qoldau körsetıp otyr.
«Filologiia ǧylymdarynyŋ zertteluı: özektı mäselelerı jäne şeşu joldary» taqyrybyna arnalǧan jiynda otandyq tıltanym ǧylymyn jüieleu, ǧylymi ızdenısterdıŋ baǧyt-baǧdaryn aiqyndau, dissertasiialyq jūmystardyŋ mazmūndyq sapasyn küşeitu mäselelerı talqylandy. Otyrysty QR Prezidentı janyndaǧy ŪǦA Direktorlar keŋesınıŋ täuelsız direktory, akademik Kärımbek Qūrmanäliev jürgızdı. Būl otyrysta ortalyq filologiia ǧylymdary boiynşa elımızdegı ırı joǧary oqu oryndarynyŋ dissertasiialyq keŋes basşylaryn bır jerge jinap, qoǧamda qyzu talqyǧa tüsıp jürgen taqyryptardy kün tärtıbıne şyǧardy.
– Ǧylym salasyndaǧy mūndai jūmys zor jauapkerşılıktı talap etedı. Bügınde ortalyq ǧylymi oi-pıkır almasatyn, zertteuler saraptalatyn bedeldı alaŋǧa ainalyp otyr. Būl tek akademiialyq mındet qana emes, sonymen qatar ūlttyq bolmysty aiqyndaityn strategiialyq baǧyt. Ortalyq qyzmetı saraptamalyq zertteulermen ǧana şektelmei, filologiia ǧylymdarynyŋ damuyna serpın beretın auqymdy mındetterdı qamtidy, – dedı jiyndy aşqan Abai atyndaǧy QazŪPU Basqarma töraǧasy-Rektory Bolat Tılep.
Saraptamalyq üilestıru ortalyǧy otandyq filologiia ǧylymdarynyŋ damuyna jüielı türde üles qosudy maqsat etedı. Onda ǧylymi dissertasiia taqyryptaryn bıryŋǧai baza arqyly qadaǧalau, talqylaudan ötkızu t.b. özektılıkterdı qarastyrdy. Ǧalymdar barlyq ǧylymi jūmystardyŋ bır ortalyqtan üilestırıluı zertteu baǧyttarynyŋ üilesımdı damuyna mümkındık beredı degen bailamǧa keldı. Jas ǧalymdardy qoldau, olardyŋ ǧylymi dissertasiialaryn süiemeldeu de köŋılge demeu beredı.
Ǧylym jäne joǧary bılım salasyndaǧy sapany qamtamasyz etu komitetınıŋ töraǧasy Ädılet Toibaev «Keibır doktoranttardyŋ disertasiia taqyryptyŋ qaitalanuy, köşırıluı sekıldı mäseleler jetkılıktı. Būl qanatqaqty joba. Eger jemısın berse, basqa da salalarǧa engızemız» dep, Filologiia ǧylymdary zertteulerın saraptamalyq üilestıru ortalyǧy jūmysyna QR Ǧylym jäne joǧary bılım ministrlıgı tarapynan qoldau bolatynyn jetkızdı. Al QR Prezidentı janyndaǧy ŪǦA ökılı Jeŋısbek Tölen, JOO-lardyŋ janyndaǧy dissertasiialyq keŋes töraǧalary men jetekşı ǧalymdar Fauziia Orazbaeva, Dihan Qamzabekūly, Qalbike Esenova, Anar Fazyljan kötırılgen taqyrypqa bailanysty jan-jaqty pıkırlerın bıldırıp, kelelı ūsynystaryn aitty.
Sondai-aq, ortalyqtyŋ bırınşı orynbasary Qalbike Esenova Saraptamalyq üilestıru ortalyǧynyŋ bolaşaqta jūmys ısteu algoritmın tüsındırıp berdı. Jiyn qorytyndysynda zertteulerdıŋ sapasyn küşeitu, ǧylymi talaptardy jetıldıru jäne ūlttyq ǧylymi derekterdıŋ sifrlyq ekojüiesın qalyptastyru arnaiy qarar qabyldandy.
Saraptamalyq üilestıru ortalyǧy aldaǧy uaqytta da osy baǧyttaǧy jūmystaryn jalǧastyra bermek.
«Abai University» media ortalyǧy
