شىلدەنىڭ ءبىرىنشى جەكسەنبىسى پاۆلودارلىقتار ۇلتتىق دومبىرا كۇنىن اتاپ ءوتتى. كاسىبي كۇيشىلەرمەن جاس دومبىراشىلاردان قۇرالعان ونەرپازدار قالا بويى كوشپەلى كونتسەرت ۇسىندى.
پاۆلودار وبلىستىق «شاڭىراق» حالىق شىعارماشىلىعى ورتالىعى ەرەكشە جوبانى جۇزەگە اسىردى. بىر كۇندە قالانىڭ بىرنەشە بولىگىندە كوشپەلى كونتسەرت ۇيىمداستىردى. كونتسەرتتەر قالا بويىنشا 7 ساياباقتا ءوتتى. ولار: ۋسولكا شاعىن اۋدانىنداعى نزم-ءنىڭ جانىنداعى ساياباق، قالالىق ورتالىق ساياباق، گاگارين پاركى، «Batyr Mall» ساۋدا ورتالىعى، ج.ايماۋىتوۆ اتىنداعى قازاق مۋزىكا-دراما تەاترىنىڭ ساياباعى، رەچ تۇراعى، ەستاي اتىنداعى قمس - ەستاي اقىننىڭ ەسكەرتكىشىنىڭ الدى.
ۇلتتىق دومبىرا كۇنىن اتاپ ءوز دەڭگەيىندە اتاپ ءوتۋ، قازاقتىڭ ۇلتتىق اسپابىن، قاسيەتتى قارا دومبىرانى كوپشىلىك قاۋىمعا ناسيحاتتاۋ، قالا كوشەلەرىندە ۇلتتىق ونەردى، ءداستۇرلى ءان، كۇي، جىر-تەرمەلەردى اۋەلەتۋ، دارىپتەۋ، كورەرمەندەر اۋديتورياسىن ماكسيمالدى اۋقىمدا قامتۋ ماقساتىندا ۇيىمداستىرىلدى.
ءىس-شارا سوڭى «Ertis Promenade» ساحناسىندا قورتىندىلاندى. وندا يسا بايزاقوۆ اتىنداعى وبلىستىق فيلارمونيانىڭ قازاق ۇلت اسپاپتار وركەسترى ونەر كورسەتتى جانە وبلىستىق «شاڭىراق» ورتالىعىنىڭ «Qagan» ەتنو-فيۋجن توبى كەشتى قىزدىرا ءتۇسىپ جينالعان ءۇش مىڭنان اسا حالىققا، ۇلتىق باعىت پەن زاماناۋي باعىتتى ۇشتاستىرعان اۋەزدى كەش ۇسىندى.
